Háttsettur hermaður ákærður fyrir meðferð á föngum í Abu Ghraib

Bandaríkjaher hefur ákært yfirmann í hernum fyrir illa meðferð á íröskum föngum í Abu Ghraib fangelsinu í Bagdad. Steve Jordan er undirofursti og hafði yfirumsjón með yfirheyrslumiðstöð Bandaríkjahers í fangelsinu síðari hluta ársins 2003.

Ákæran gegn honum er í sjö liðum og hann sakaður um að hafa misþyrmt föngum og meðhöndlað þá með grimmilegum hætti. Enginn hermaður með jafn háa tign hefur áður verið ákærður fyrir meðferð á föngum í Abu Ghraib en tíu lægra settir hermenn hafa verið sakfelldir vegna brota þar á árunum 2003 til 2004.

Tveimur foringjum, æðri Jordan, hefur verið refsað fyrir þátt þeirra í misþyrmingunum en þeir eiga ekki yfir höfði sér ákærur. Upp komst um málið í apríl 2004 þegar birtar voru ljósmyndir af illri meðferð á föngum í Abu Ghraib.