Íraksstríðið dýrara en stríðið í Víetnam

Allt stefnir í að kostnaður Bandaríkjamanna vegna stríðsrekstrarins í Írak verði meiri en við Víetnamstríðið. Samanlögð útgjöld vegna hernáms Afganistans og Íraks nema um 60 þúsund milljörðum króna.

Þessar upplýsingar koma fram í nýrri skýrslu sem rannsóknarstofnun á vegum Bandaríkjaþings kynnti í vikunni þar sem heildarkostnaður við hernámið í Írak er metinn. Nú þegar hefur rúmlega 23 þúsund milljörðum íslenskra króna verið varið til þess. Þau útgjöld fara ekki minnkandi því á þessu ári er gert ráð fyrir að þau verði 7.500 milljarðar, samanborið við 3.800 milljarða árið 2003, þegar ráðist var inn í landið.

Upphæðirnar sem um ræðir eru nánast óskiljanlegar, en reynum samt að setja þær í samhengi. Hvern einasta dag nemur beinn kostnaður við hernámið 200 milljónum dala eða rúmum 14 milljörðum íslenskra króna . Það jafngildir rekstrarkostnaði allra framhaldsskóla Íslands á þessu ári.

Þessar tölur eru í miklu ósamræmi við þær bjartsýnu spár sem lagt var upp með í upphafi. Donald Rumsfeld, landvarnaráðherra, reiknaði með heildarútgjöldum upp á 3.700 milljarða. Paul Wolfowitz, þáverandi aðstoðarlandvarnaráðherra, gekk meira segja svo langt að segja að olíusölutekjur Íraka myndu á augabragði þýða að uppbyggingin myndi skila hagnaði.

Í dag eru 130.000 bandarískir hermenn í Írak og stefnir Bandaríkjastjórn að því að hefja heimkvaðningu þeirra sem fyrst. Höfundar skýrslunnar segja að þótt brottflutningurinn muni ganga hratt og vel fyrir sig þá verði heildarkostnaðurinn við hernaðinn rúmir 50 þúsund milljarðar króna. Það er 10 þúsund milljörðum hærri upphæð en varið var til hins átta ára langa Víetnam-stríðs.

Þegar við bætist svo 9 þúsund milljarða króna reikningur fyrir hernám Afganistans er ekki að undra að þorra Bandaríkjamanna blöskri yfir fjáraustrinum.