Segir margar ríkar þjóðir hafa brugðist

Margar af ríkustu þjóðum heims hafa brugðist þegar kemur að því að aðstoða fórnarlömb jarðskjálftans í Suður-Asíu sem varð fyrir tæpum þremur vikum. Þetta segja bresku hjálparsamtökin Oxfam og benda á að einungis hafi fengist loforð fyrir þriðjungi þess fjár sem Sameinuðu þjóðirnar hafa farið fram á vegna hamfaranna.

Oxfam segir að Bandaríkjamenn, Japanar, Þjóðverjar og Ítalir hefðu ekki lagt sitt af mörkum og þá hefðu meðal annars Frakkar, Belgar, Austurríkismenn og Finnar ekki látið neitt af hendi rakna. Þá bentu hjálparsamtökin á að mikið fé vantaði í nýstofnaðan neyðarsjóð Sameiðuðu þjóðanna sem nota á þegar neyðarástand skapast einhvers staðar í heiminum, eins og nú er tilfellið í Pakistan. Aðeins hafa borist rúmlega tíu milljarðar króna af rúmlega sextíu milljörðum króna sem þjóðir heims hugðust leggja fram við stofnun sjóðsins.

Þær þjóðir sem þegar hafa látið fjármuni og hjálpargögn renna til bágstaddra á hamfarasvæðunum funda í dag í Genf í Sviss þar sem reynt verður að afla meira fjár til hjálparstarfsins, en Sameinuðu þjóðirnar segja að dauðinn vofi yfir allt að átta hundruðu þúsund manns ef ekki berist meiri aðstoð frá þjóðum heims.

Áætlað er að fimmtungur þeirra sem varð fyrir tjóni þegar skjálftinn reið yfir hafi enn enga hjálp fengið. Talið er að rúmlega 53 þúsund manns hafi látist í skjálftnum 8. október síðastliðinn, langflestir í pakistanska hluta Kasmír.