Sjálfstæðisflokkur með meirihluta

Sjálfstæðisflokkurinn fengi hreinan meirihluta í borgarstjórn Reykjavíkur, yrði gengið til kosninga nú. Þetta eru niðurstöður þjóðarpúls Gallups, en greint var frá þessu í fréttum Ríkissjónvarpsins í gærkvöld. Samkvæmt könnuninni fengi Sjálfstæðisflokkurinn 48 prósent atkvæða og 8 menn í borgarstjórn. Reykjavíkurlistinn fengi 47% atkvæða og 7 menn kjörna og Frjálslyndir myndu þurrkast út í borgarstjórn. Vilhjálmur Þ. Vilhjálmsson, oddviti Sjálfstæðismanna í Reykjavík segist afar þakklátur fyrir þennan stuðning borgarbúa. Og hann sagði einnig að ef spurt væri um skýringar þá væri helst hægt að benda á að þetta væri árangurinn af góðu starfi Sjálfstæðismanna undanfarin misseri. Hann sagði þá ætla að halda því starfi áfram og vonaðist til að þeir nytu áfram sama trausts. Árni Þór Sigurðsson, borgarfulltrúi R-listans segir þessar niðurstöður staðfestingu á því að 2 fylkingar takist á um völdin í borginni. Hann sagði jafnframt að hluti skýringarinnar væri sú að Sjálfstæðisflokkur hefði verið mikið í umræðunni að undanförnu. Einnig benti hann á að ein skýring væri sú að R-lista flokkarnir hefðu ekki lokið sínum viðræðum. Vilhjálmur segir eins og Árni að ljóst sé að mikil barátta sé framundan en. Hann segir þá vera búna að sinna mikilli undurbúningsvinnu og að þeir séu tilbúnir í slaginn. Hann segir ástæður fylgishruns R-listans sé einfaldlega frammistaða hans í borgarmálum. Árni Þór segir þessa könnun vera hvatningu til flokkanna sem standa að R-listanum um að spíta í lófana og taka ákvörðun um hvernig þeir bjóði fram að vori. Hann telur ekki að ein svona könnun hafi nein úrslitaáhrif á hvort flokkarnir þrír bjóði fram sameiginlega eða ekki. Hann segir að það séu málefnin sjálf sem ráða því hvernig útslitin verða.