Áfrýjunarréttarhaldi frestað

Dómstóll í Moskvu féllst í gær á beiðni Mikhaíls Khodorkovskís um að fresta réttarhaldi um áfrýjun dómsins yfir honum fram á fimmtudag, í því skyni að gera aðalverjanda hans fært að mæta í réttinn. Hann er á sjúkrahúsi. Khodorkovskí, sem um skeið var ríkasti maður Rússlands en er nú frægasti tugthúslimur landsins, var í maí síðastliðnum dæmdur í níu ára fangelsi fyrir skattsvik og fjármálaglæpi, í réttarhaldi sem margir álíta hafa verið pólitíska hefnd Vladimírs Pútíns forseta fyrir meint brot olíuauðjöfursins á óskrifuðu samkomulagi um að hann skipti sér ekki af stjórnmálum. Khodorkovskí sækist nú eftir því að fara í framboð í aukakosningum til rússneska þingsins sem fara fram í byrjun desember. Honum er það heimilt ef dómurinn yfir honum er í áfrýjun. Lögmenn Khodorkovskís hafa haldið því fram að dómsyfirvöld væru að reyna að hraða afgreiðslu áfrýjunarinnar til að hindra framboð hans.