Hefur komið víða við

Davíð Oddsson utanríkisráðherra á að baki litríkan feril í stjórnmálum og óhætt að segja að um hann hafi gustað á stundum. En þótt stjórnmálin hafi verið hans helsta viðfangsefni hefur hann komið víða við. Davíð Oddsson fæddist í Reykjavík 17. janúar árið 1948. Hann vakti þjóðarathygli strax í menntaskóla þegar hann sá um útvarpsþáttinn Útvarp Matthildur árin 1968-1975 ásamt félögum sínum og vinum, þeim Þórarni Eldjárn og Hrafni Gunnlaugssyni. Hann lauk stúdentsprófi frá Menntaskólanum í Reykjavík árið 1970. Eftir stúdentinn lá leið Davíðs í lögfræðideild Háskóla Íslands og þar lauk hann prófi árið 1976. Enginn þurfti að efast um stórnmálaskoðanir Davíðs á unga árum og hann settist í stjórn Sambands ungra sjálfstæðismanna árið 1973. Það var hins vegar ekki fyrr en árið 1982 sem hann varð atvinnustjórnmálamaður þegar hann varð borgarstjóri í Reykjavík, þá aðeins 34 ára gamall. Fram að því hafði hann meðal annars verið skrifstofustjóri hjá Leikfélagi Reykjavíkur, þingfréttaritari Morgunblaðsins, Starfsmaður almenna bókafélagsins, skrifstofustjóri og framkvæmdastjóri Sjúkrasamlags Reykjavíkur og framkvæmdastjóri Listahátíðar í Reykjavík. Davíð var borgarstjóri í níu ár og þótti hafa mjög ákveðinn stjórnunarstíl. Andstæðingar hans sökuðu hann þá, og raunar æ síðan, um einræðistilburði. Í byrjun níunda áratugarins hellti Davíð sér út í landsmálapólitík. Hann bauð sig fram gegn sitjandi formanni Sjálfstæðisflokksins, Þorsteini Pálssyni, og fór með sigur af hólmi. Hann fór því beint úr stól borgarstjóra í forsætisráðuneytið árið 1991. Þar sat hann svo allra karla lengst, eða til 2004, að hann hafði stólaskipti við Halldór Ásgrímsson og varð utanríkisráðherra.  Með fram stjórnmálunum hefur Davíð fengist við ritstörf og sent frá sér bæði leikrit og skáldsögur. Um Davíð Oddsson má segja að það er engum sama um hann. Í skoðanakönnunum undanfarinna ára hefur hann verið hvort tveggja vinsælasti stjórnmálamaður landsins og sá óvinsælasti. Davíð er þekktur fyrir skondin tilsvör og er þess skemmst að minnast að hann sagði um upplausn R-listans að það væri góður endir á vondum ferli. Davíð hefur einnig fengist við nýyrðasmíði. Hann fann til dæmis upp orðið afturhaldskommatittsflokkur. Davíð er vinamargur maður og vegna langrar setu á ráðherrastóli búa margir vinir hans erlendis. Til þeirra má til dæmis telja forsetahjónin fyrrverandi, Bill og Hillary Clinton, en sjaldan hafa sést innilegri kveðjur stjórnmálamanna hér á landi og þegar þau heimsóttu Davíð í veikindum hans. Og jafnvel hörðustu andstæðingar á þingi hérlendis bera honum ekki illa söguna, í persónulegum viðskiptum.