Indiana sigraði LA Clippers

Indiana sigraði LA Clippers í nótt 97-75 á heimavelli sínum og færði Clippers fjórða tap sitt í síðustu fimm leikjum sínum. Stephen Jackson var stigahæstur í liði Indiana Pacers með 24 stig, en Elton Brand skoraði 29 stig hjá Clippers.

New Jersey vann fjórða leikinn í röð þegar liðið skellti Orlando 96-85. Vince Carter skoraði 32 stig hjá New Jersey, en Grant Hill og Steve Francis skoruðu 16 hvor hjá Orlando og Dwight Howard skoraði 14 stig og hirti 15 fráköst.

Philadelphia lagði Golden State 111-100. Allen Iverson skoraði 38 stig fyrir Philadelphia en Jason Richardson var með 24 stig hjá Golden State.

Boston sigraði Utah 101-89. Paul Pierce skoraði 30 stig hjá Boston, en Mehmet Okur skoraði 23 stig, hirti 11 fráköst og gaf 7 stoðsendingar hjá Utah.

San Antonio vann auðveldan sigur á New York Knicks á útivelli 109-96, en San Antonio gat hvílt byrjunarliðsmenn sína í síðari hálfleik eftir að vera búið að gera út um leikinn. Michael Finley skoraði 19 stig hjá San Antonio, en Jamal Crawford var með 16 hjá New York.

Minnesota vann auðveldan sigur á New Orleans 88-69 og stöðvaði þar með fjögurra leikja taphrinu. Wally Szcerbiak skoraði 21 stig fyrir Minnesota en Chris Paul var með 15 stig hjá New Orleans.

Memphis vann Portland 89-79. Pau Gasol skoraði 26 stig, hirti 12 fráköst og varði 5 skot hjá Memphis, en Juan Dixon skoraði 17 stig fyrir Portland.

Toronto vann góðan útisigur á Houston 94-81. Tracy McGrady skoraði aðeins 7 stig hjá Houston og munar um minna, en liðið er einnig án Yao Ming. Juwan Howard skoraði 21 stig og hirti 12 fráköst fyrir Houston í leiknum, en Mike James var með 19 stig hjá Toronto.

Loks vann Washington sigur á Denver á útivelli 116-110 eftir að hafa tapað þremur leikjum í röð. Gilbert Arenas skoraði 36 stig fyrir Washington og gaf 11 stoðsendingar, en Carmelo Anthony var með 29 stig hjá Denver.