Hungursneyð í Malaví

Yfirvofandi hungursneyð í Malaví mun hafa áhrif á um helming þjóðarinnar, að sögn forseta landsins, Bingu wa Mutharika, sem kallaði á hjálp frá öðrum þjóðum í ríkissjónvarpi og -útvarpi landsins á laugardag. Að sögn forsetans skortir íbúa í öllum 28 héruðum landsins mat. Neyðarástandið má að hluta rekja til afar slæmrar uppskeru vegna þurrka og skorts á fræjum og áburði, og hefur ástandið versnað mjög í landinu seinustu vikurnar. Auk þess vega áhrif alnæmisveirunnar þungt í hörmungarástandi þjóðarinnar, því margir bændur eru of veikir til að sinna um akra sína. Ástandið er sérstaklega slæmt í suðurhluta landsins þar sem margir þorpsbúar lifa eingöngu á rótarhnýðum vatnaliljuplöntunnar, sem grær á svæðum þar sem oft er mikið um krókódíla. Á þessum tíma árs verða að minnsta kosti tveir menn í hnýðisleit krókódílunum að bráð á dag. „Fólk verður að velja annað af tvennu illu, annað hvort að sækja hnýði og taka áhættuna um að ráðist verði á það, eða að halda sig heima og fá ekkert að borða,“ segir veiðimaðurinn Khalid Hassen. Forsetinn segir Malaví munu kaupa 300.000 tonn af maísmjöli frá Suður-Afríku að verðmæti um þrjá milljarða íslenskra króna, en þörf er á að minnsta kosti 144.000 tonnum í viðbót. Sameinuðu þjóðirnar áætla að um fimm milljónir Malavíbúa muni þarfnast aðstoðar áður en langt um líður, en ellefu milljónir búa í landinu. Sameinuðu þjóðirnar hafa sótt um fimm milljarða íslenskra króna aðstsoð til handa ríkinu en eingöngu tæplega tveir milljarðar króna hafa borist enn sem komið er. Mutharika hefur verið ásakaður um að neita fréttum af dauðsföllum vegna veikinda sem hungur veldur og að kalla of seint eftir hjálp. Hann neitar þessum ásökunum og segir ríkisstjórn sína hafa brugðist við á réttan hátt. Forsetinn mætir sífellt meiri andstöðu og á föstudag mótmælti þingið meintum embættisbrotum hans.