Aukið samstarf vegna hamfara

Norðurlöndin ætla að auka samstarf vegna náttúruhamfara. Þetta var ákveðið á fundi forsætisráðherra Norðurlandanna í Danmörku í gær. Í þeim löndum þar sem engin eru íslensk sendiráð geta Íslendingar leitað aðstoðar í öðrum norrænum sendiráðum. Annars voru Evrópusambandsmál ofarlega á baugi þótt tvö ríki eigi ekki aðild að sambandinu. Aukið norrænt samstarf vegna hugsanlegra náttúruhamfara nær m.a. yfir áætlun um brottflutning fólks af hættusvæðum, hýsingu fórnarlamba, aðstoð við ættingja og upplýsingaveitu til fjölmiðla. Íbúar Norðurlandanna geta einnig leitað aðstoðar í öðrum orrænum sendiráðum. Halldór Ásgrímsson forsætisráðherra segir það mikilvægt fyrir Íslendinga ef eitthvað kemur upp á, t.d. á ferðamannastöðum. „Við gátum sent flugvél með mjög litlum fyrirvara, og breytt henni í reynd í sjúkrastofu, þannig að við höfum líka reynslu sem getur komið til góða," segir Halldór. Hann segir málið verða rætt nánar á fundi utanríkisráðherra Norðurlandanna sem haldinn verður í Danmörku í ágúst. Norrænu ríkisstjórnirnar eru með þessu að bregðast við gagnrýni á störf sín í kjölfar flóðbylgjunnar í Asíu. Kjell Magne Bondevik, forsætisráðherra Noregs, segir að Norðurlönd geti unnið betur saman en þá var gert. Evrópusambandið var líka rætt á fundinum í gær í ljósi þróunarinnar eftir að Frakkar og Hollendingar felldu stjórnarskrá sambandsins. Halldór og Bondevik eru sammála um að staða mála lengi enn frekar umræðuferlið um aðild landanna tveggja að sambandinu. Hagræðing á norrænu samstarfi er sú ákvörðun nefnd að fækka ráðherranefndum úr átján í ellefu. Aðspurður hvort norrænt samstarf sé að láta undan auknu Evrópusamstarfi segir Halldór svo alls ekki vera. Það liggi fyrir að stjórnmálamenn hafi minni tíma en áður vegna aukins alþjóðasamstarfs. „Það er algjörlega nauðsynlegt að samræma betur norræna samstarfið, fækka þar nefndum, sérstaklega ráðherranefndunum, þannig að þetta verði hagkvæmara," segir Halldór. Nánar verður fjallað um fund norrænu forsætisráðherranna sem lýkur í dag í fréttum Stöðvar 2 í kvöld.