Ekki verði gripið til séraðgerða

Afkoma og rekstrarskilyrði sjávarútvegsins eru óviðunandi, samkvæmt niðurstöðum svokallaðrar hágengisnefndar sem skilaði af sér í dag. Ekki er þó talin ástæða til að grípa til sértækra aðgerða og það má jafnvel sjá merki um jákvæða þróun mitt í öllum erfiðleikunum. Árni Mathiesen sjávarútvegsráðherra skipaði nefnd í janúar til að fjalla um áhrif hás gengis krónunnar á sjávarútveginn. Það má segja að niðurstöður nefndarinnar séu að einhverju leyti bæði jákvæðar og neikvæðar fyrir greinina. Árni segir að greinilegt sé að ástandið hafi haft mjög slæm áhrif á rekstur sjávarútvegsins og til lengri tíma litið sé slík rekstarniðurstaða ekki viðunandi. Hún sé hins vegar ekki verri á fyrsta ársfjórðungi þess árs heldur en á síðasta áratug og það sýni hvað greinin hafi styrkst mikið. Skýrsluhöfundar telja ástandið tímabundið og því sé ekki ástæða til að grípa til sértækra aðgerða. Ekki er lagt til að hróflað verði við veiðigjaldinu sem lagt var á í fyrsta sinn á yfirstandandi fiskveiðiári og lagst er gegn því að gripið verði inn í aðgerðir Seðlabankans, hann verði að reyna að halda verðbólgunni í skefjum þótt vaxtahækkanir hans hækki gengi krónunnar. Á fyrsta ársfjórðungi þessa árs var hreinn hagnaður af sjávarútveginum aðeins 2 prósent sem þykir mjög lélegt. En eru erfið skilyrði útflutningsgreina ekki fórnarkostnaður sem vitað var að þyrfti að greiða þegar ákveðið var að ráðast í stóriðjuframkvæmdir fyrir austan? Árni segir að að sínu mati séu ástæðurnar fyrir hágenginu ekki svo mjög framkvæmdirnar fyrir austan heldur samkeppni á íbúðalánamarkaði og miðað við þær breytingar sem þar hafi orðið, sem séu margar mjög jákvæðar, geti vel verið að menn telji þetta viðunandi fórnarkostnað þegar litið verði til baka síðar meir.