Ekki staðið við stóru orðin

Fjölga þarf opinberum störfum í Eyjafirði um 330 ef þau eiga að vera hlutfallslega jafn mörg og á höfuðborgarsvæðinu. Halldór Ragnar Gíslason, verkefnisstjóri hjá Atvinnuþróunarfélagi Eyjafjarðar, segir að þrátt fyrir fögur fyrirheit hafi stjórnvöld ekki staðið við að flytja opinber störf og verkefni til Akureyrar. "Frá því í fyrra hefur opinberum störfum í Eyjafirði fækkað um níu og við sjáum ekkert sem bendir til að þeim sé að fjölga í bráð. Hagstofu Íslands mætti auðveldlega flytja í heild sinni til Akureyrar en þar er nú 121 starfsmaður," segir Halldór Atvinnuþróunarfélagið hefur gefið út samanburðarskýrslu um fjölda ríkisstarfa á höfuðborgarsvæðinu og í Eyjafirði og þar kemur fram að 90 prósent ríkisstarfa sem tengjast sjávarútvegi eru á höfuðborgarsvæðinu en aðeins 4,6 prósent í Eyjafirði. "Það eru ótrúlega fá opinber störf í Eyjafirði sem tengjast sjávarútvegi og annarri matvælavinnslu en þar eiga þau vel heima. Einnig væri hægt að flytja hingað stofnanir eins og Iðntæknistofnun og Orkustofnun," segir Halldór.