Litla lirfan inn á hvert heimili

Allsérstakur sumarglaðningur mun berast inn á hvert heimili á Íslandi fyrstu viku sumars. Um er að ræða DVD-disk með teiknimyndinni Kötu - Litlu lirfunni ljótu, á sjö tungumálum. Skýringin á þessum sumarglaðningi er sú að Umhyggja, félag til styrktar langveikum börnum, og Barnahjálp Sameinuðu þjóðanna á Íslandi hafa tekið höndum saman um átak til styrktar starfsemi samtakanna og til góðs fyrir börn, bæði á Íslandi og um heim allan. Þessi útgáfa af teiknimyndinni er stærsta upplag sem dreift hefur verið af nokkurri mynd á Íslandi. Hún er fyrsta íslenska tölvugerða teiknimyndin og hefur unnið til fjölda verðlauna víða um heim. Með disknum fylgir gíróseðill að upphæð 2.000 krónur þar sem viðtakanda gefst tækifæri til að styrkja gott málefni. Dreifing diskanna mun standa yfir dagana 22. apríl til 5. maí.