Rúmlega 40 ríkisfangslausir

Rúmlega 40 einstaklingar eru skráðir með lögheimili hér á landi en eru án ríkisfangs, með öðrum orðum "landlausir" eins og það er nefnt. Á svonefndri utangarðsskrá eru átta manns. Þessar upplýsingar fengust á Hagstofu Íslands. Guðni Baldursson hjá Þjóðskrá Hagstofunnar sagði, að á munurinn á þessu tvennu væri sá, að á utangarðsskránni væri fólk sem væri hér til bráðabirgða, en hefði ekki dvalarleyfi. Í sumum tilvikum væru menn að bíða eftir því að komast inn á þjóðskrá. Þetta fólk væri án ríkisfangs í öðrum löndum. Hinir fyrrnefndu hefðu landvistarleyfi og öll önnur leyfi í lagi. Ekkert hefur gerst í málefnum Aslans Gilaevs, mannsins sem kom skilríkjalaus hingað fyrir um það bil fimm árum og Fréttablaðið ræddi við fyrir skömmu. Dvalarleyfi hans, sem er til bráðabirgða, rennur út 1. ágúst. Alþjóðadeild lögreglunnar hefur grafist fyrir um uppruna mannsins en hefur ekki fundið neitt ennþá sem bendir til þess hvaðan hann hafi komið. Hans mál hefur því nokkra sérstöðu hvað varðar ríkisfang. Jóhann Jóhannsson hjá Útlendingastofnun sagði að skipta mætti hinum ríkisfangslausu í þrjá flokka. Hluti væri "kvótaflóttamenn" sem þyrftu að dvelja hér í fimm ár áður en þeir fengju ríkisfang hér, ef þeir óskuðu eftir því á annað borð. "Síðan er eitthvað af fólki sem hefur verið heimilað að koma hingað, til að mynda í fjölskyldusameiningu," sagði Jóhann. "Það hefur áður verið flóttamenn, sem hefur fengið búsetuleyfi hér þótt það sé ríkisfangslaust. Þá eru hópur ríkisfangslausra frá Eystrasaltsríkjunum sem hefur fengið að koma hingað. Nefna má Rússana sem lokuðust inni í baltnesku löndunum, þegar Sovétríkin liðuðust í sundur, en þeir fengu ekki ríkisfang í nýju ríkjunum. Þeir eru hér eins og Eystrasaltsfólk, sem nýtur ekki ríkisborgararéttar í þessum ríkjum." Spurður hvað yrði um hina ríkisfangslausu hér á landi sagði Jóhann, að flestir yrðu um kyrrt og fengju ríkisborgararétt, aðrir færu aftur úr landi.