Landbúnaðarverðlaunin afhent

Garðyrkjustöðin Melar við Flúðir, ábúendur í Sveinungsvík í Þistilfirði og félagsbúendur á Helgavatni í Borgarfirði fengu í dag landbúnaðarverðlaunin árið 2005 á Búnaðarþingi sem fram fór á Hótel Sögu. Garðyrkjustöðin Melar við Flúðir, sem er í eigu Sigríðar Helgu Karlsdóttur og Guðjóns Birgissonar, fékk verðlaunin vegna uppbyggingar myndarlegs garðyrkjubýlis og myndarlegs reksturs þess ásamt frumkvöðlastarfi á sviði lýsingar í gróðurhúsum og þar með eflingu nýs framleiðsluþáttar, vetrarframleiðslunnar, eins og segir í úrskurði dómnefndar. Þá fengu Kristín Hildur Árnadóttir og Gunnar Guðmundsson, ábúendur á hinni fornu jörð Sveinungsvík í Þistilfirði, verðlaun fyrir áræði og dugnað við að endurbyggja jörðina, hugkvæmni við að nýta gæði hennar og afburðaárangur í sauðfjárrækt, en þau settust að í Sveinungsvík árið 1988 þegar jörðin hafði verið í eyði í rúm 20 ár. Loks voru hjónin Karitas Hreinsdóttir og Pétur Diðriksson og Ágústa Gunnarsdóttir og Vilhjálmur Diðriksson, félagsbúendur á Helgavatni í Borgarfirði, verðlaunuð fyrir myndarlegan félagsbúskap þar sem ýtrustu hagsýni er beitt við hverja lausn, snyrtimennska ríkir og afurðasemi er með miklum ágætum.