Reyndist hafa logið um björgun

Fertugur maður, sem sagði að sér hefði verið bjargað úr rústum heimilis síns í Kerman-héraði í suðausturhluta Írans viku eftir að jarðskjálfti skók héraðið, reyndist hafa logið. Fréttastofan IRNA greindi frá því fyrr í dag að íbúar í bæ mannsins hefðu fundið hann þegar þeir hreinsuðu til eftir hamfarirnar en Reuters-fréttastofan segir að eftir að fréttin hafi birst hafi nokkrir embættismenn í héraðinu haft samband við fréttastofuna til þess að greina frá því að maðurinn væri svikari. Vinir hans hafi komið með hann á sjúkrahús og sagst hafa grafið hann undan rústum húss síns. Hins vegar hafi hann reynst stálsleginn og því fór lækna að gruna sitthvað misjafnt. Kom þá í ljós að maðurinn var lyfjafíkill og hafði skáldað söguna til þess að verða sér út um lyf.