Kærir Costner fyrir „of­beldis­fulla ó­undir­búna“ nauðgunarsenu

Devyn LaBella, sem var áhættuleikari fyrir leikkonuna Ellu Hunt, lýsir því að hún hlotið varanlegan sálrænan skaða af atvikinu og fer hún fram á opinbera afsökunarbeiðni og óskilgreindar skaðabætur. Lögfræðingur Costner segir ásakanirnar ekki halda vatni og vera fjárkúgunartaktík.

Samkvæmt stefnu LaBella, sem var birt fyrir dómstólum í Los Angeles-sýslu í Kaliforníu á þriðjudag, var senan tekin upp í maí 2023 í Utah en daginn áður hafði hún tekið upp sambærilega senu án vandkvæða, enda hafði verið búið að skipuleggja hana og undirbúa. 

Senan hafi brotið samskiptareglur í samningum SAG-AFTRA, verkalýðsfélags kvikmyndagerðarfólks, sem krefjast 48 klukkutíma fyrirvara og samþykkis fyrir öllum senum sem innihalda nekt eða leikið kynlíf.

Senunni bætt við með stuttum fyrirvara

Samkvæmt stefnunni bætti Costner auka nauðgunarsenu við með öðrum karlkyns leikara sem átti að klifra ofan á Hunt og þukla inn undir pils hennar. 

Viðbótarsenan var ekki dagskrá tökudagsins (e. call sheet) og ekki var gert ráð fyrir nándarþjálfa, sem vinnur með leikurum fyrir og eftir senur sem innihalda nekt eða kynlíf til að tryggja að þeir séu öruggir.

„Hunt varð sýnilega misboðið og gekk af tökustaðnum og neitaði að leika í senunni,“ segir í stefnu LaBella.

Þá hafi verið kalla á LaBella til að hlaupa í skarðið. Hún hafi ekki verið undirbúin undir senuna og fengið upplýsingar um hana þegar tökur á henni voru þegar byrjaðar. Samkvæmt stefnunni þurfti að taka senuna upp mörgum sinnum.

„Þennan dag var ég skilin eftir berskjölduð, óvernduð og innilega svikin af kerfi sem lofaði öryggi og fagmennsku,“ sagði LaBella í yfirlýsingu. „Það sem gerðist mölbraut traust mitt og breytti því varanlega hvernig ég hegða mér í þessum iðnaði.“

„Fjárkúgunartaktar“ rað-ásakara

Costner hefur neitað ásökununum LaBella gegnum lögfræðing sinn, Marty Singer, sem sagði að Costner reyni „alltaf að tryggja að öllum líði vel í myndum hans og taki öryggi á tökustað mjög alvarlega.“

„Hins vegar er enginn fótur fyrir þessari kröfu og brýtur í bága við gjörðir hennar og staðreyndirnar,“ sagði Singer í yfirlýsingu fyrir hönd Costner.

„Fröken LaBella er rað-ásakari í skemmtanabransanum og hefur unnið með sama lögfræðingi að eldri kröfum. En þessir fjárkúgunartaktar munu ekki virka í þessu tilfelli,“ sagði hann jafnframt.

Að sögn Singer var atriðið útskýrt fyrir LaBella og eftir æfingu hafi hún gefið þumalinn til áhættustjórans (e. stunt coordinator) sem hafi sýnt að hún var fús til þess að taka upp senuna. Um kvöldið hafi LaBella borðað með kollegum sínum, verið í „góðu skapi“ og „ekki kvartað yfir neinu til þeirra“.

Samstarfsfélagar afsökuðu hegðun Costner

Þessar lýsingar Singer stangast á við stefnuna þar sem hún segist hafa spurt kollega sína um kvöldið hvernig senunni var leyft að eiga sér stað.

„Eftir að hún lýsti yfir hneykslan sinni og áhyggjum kenndu karlkyns gestirnir henni um að hafa ekki sagt neitt,“ segir í stefnunni. Hún hafi upplifað sig einangraða en þar sem tökum var ekki lokið hafi hún haldið áfram að vinna og reynt að vera fagmannlega.

Í stefnunni er því lýst hvernig hún hafi næstu daga reglulega grátið yfir því sem gerðist. Það sem gerði andrúmsloftið líka óþægilegt var að samstarfsfólk hennar kom reglulega upp að henni til að biðjast afsökunar á hegðun Costner.

LaBella var ekki ráðin aftur til að vinna að Horizon 3 og hefur ekki verið ráðin í nein af verkefnum áhættustjórans sem hún vann með í myndinni þó hún hafi unnið reglulega með honum áður. 

Horizon 2 er önnur myndin í fjögurra mynda vestraröð í leikstjórn Costner. Fyrsta myndin, sem kostaði 100 milljónir dala, halaði aðeins inn ellefu milljónum dala í bíó og var því hætt við að önnur myndin færi í bíó.