Segir Ísraels­her hafa myrt leið­toga Hamas

Netanjahú tilkynnti andlát Sinwar í ræðu á ísraelska þinginu þar sem hann las upp nöfn allra fulltrúa Hamas sem Ísraelsher hefur myrt á síðustu tuttugu mánuðum. Forsætisráðherrann hafði áður sagst telja að Sinwar væri látinn. Hamas hefur ekki staðfest andlát leiðtogans.

Sinwar er talinn vera sá sem skipulagði árás Hamas á Ísrael þann 7. október 2023. Þar voru um tólf hundruð manns myrtir og 250 teknir sem gíslar. Hann er einnig yngri bróðir Yahya Sinwar, fyrrverandi leiðtoga Hamas sem var myrtur í október 2024.

Mohammad Sinwar tók við sem leiðtogi Hamas eftir andlát bróður síns. Hann er talinn hafa verið á sjúkrahúsi á suðurhluta Gasastrandarinnar þegar Ísraelar réðust á sjúkrahúsið.

Ísraelsher hefur svarað árásinni 7. október 2023 harkalega. Stutt vopnahlé í byrjun árs var rofið með loftárásum hersins og hafa forsvarsmenn Ísrael boðað enn harðari aðgerðir. Auk þess ætla þeir að hernema Gasaströndina og halda svæðinu um óákveðin tíma. Samkvæmt umfjöllun Reuters hefur andsvar Ísraels við árásinni 2023 valdið dauða 53 þúsund íbúa á Gasa. Yfir tvær milljónir Palestínubúa eru á flótta.