Lýsa miklum troðningi, á­tökum og gráti á FM95BLÖ

Miklar umræður eru um tónleikana á samfélagsmiðlum og Reddit auk þess sem mikill fjöldi hefur deilt myndböndum af miklum troðningi á Facebook og Tiktok.

Þrír voru fluttir á slysadeild á tónleikunum og tveir handteknir fyrir brot á vopnalögum. Þá var einnig tilkynnt um líkamsárás. Samkvæmt upplýsingum frá slökkviliði var dælubíll á staðnum vegna troðnings. Laugardalshöllin rúmar allt að ellefu þúsund manns í einu samkvæmt heimasíðu.

Gæsla takmörkuð og starfsfólk á bar í gæslu

Starfsmenn í gæslu lýsa því í athugasemdum á Beautytips að það hafi verið takmörkuð gæsla, gestir ekki beðnir um skilríki og það hafi verið mikið álag á starfsfólk á barnum því starfsfólk sem átti að sinna gæslu hafi ekki sinnt starfi sínu. Annar segir allt við gæsluna hafa farið úrskeiðis og að starfsmenn í gæslu hafi ekki fengið kennslu og takmarkaðar leiðbeiningar. Erfitt hafi verið að ná á yfirmann gæslunnar og ekki eins margir í gæslu og höfðu verið skráðir.

Flestar frásagnir af tónleikunum eru nafnlausar á samfélagsmiðlum en þar segir til dæmis:

„Já þetta var hræðilegt lenti i þessum troðningi, náði klifra upp handfang á stiga til komast út, það komst enginn neitt svo sá ég um 10 manns liggjandi ofan á hvort öðru í litla stiganum, við fórum heim eftir þetta“.

Pissuðu á gólfið

Ein segist hafa beðið í fjörutíu mínútur eftir því að komast á salernið og er því svarað af tveimur sem lýstu því að hafa séð tvær ungar konur pissa á gólfið því þær hafi ekki náð að fara á klósettið.

Annar lýsir því að vinur hans hafi orðið fyrir líkamsárás:

„Vinur minn, mesta litla krútt í heimi var tekinn hálstaki og barinn af tvem/þrem gaurum inni í crowdinu af ástæðulausu, allur út í klórförum og með kúlu á andlitinu.“

Einn lýsir því að hafa ekki getað annað en stigið á fólk sem lá í stiganum á leið út.

„Festist í miðjunni, togið mig í sitthvorar áttir, týndi öllum,svo þegar ég var komin að stigunum gat ég ekkert annað gert en að stíga á greyið fólkið sem datt niður, hágrátandi aldrei öskrað jafn mikið í lífinu mínu.“

Hágrátandi blóðugt fólk

Fjölmargir lýsa því að hafa farið grátandi af tónleikunum áður en þeir kláruðust.

„Já bjóst ekki beint við því kasólétt að þurfa að rífa upp öryggishlið til að komast upp á efri hæðina.. bara vegna hræðslu um að kremjast undir fólki. Lögreglan því miður stóð bara og horfði á hópinn æsast meira og meira upp. Ég þakka bara fyrir að hafa komist í burtu og upp á aðra hæð. Að horfa á hágrátandi blóðugt fólk borið í burtu var svakalegt og ég var lengi að jafna mig.. enda fór ég um leið og færi gafst..“

Einn gesta lýsir því að hafa komið á tónleikana um klukkan 21 og fengið áfall.

„Ég hef aldrei séð annað eins í gegnum ævina…Við komumst ekki inn að sviðinu þar sem mannþröng var föst i stiganum. Lögreglan stoð þarna öskrandi á alla að fara út. Fékk að heyra frá stelpu að allir þyrftu að fara út því það væri verið að traðka fólk niður og annað. Ég átti ekki til aukatekið orð. Ég hef farið víða á allskonar viðburði og tónleika, með mjög frægum einstaklingum, og ekki, aldrei nokkurn tímann séð annað eins.“