Hitnar undir Joschka Fischer

Hart er sótt að Joschka Fischer, utanríkisráðherra Þýskalands, fyrir það hvernig austur-evrópskir glæpamenn gátu notfært sér ferðamannaáritanir úr þýskum sendiráðum til að komast til Vesturlanda. Meðal þeirra sem fóru til Vesturlanda á þessum forsendum voru konur sem glæpamenn neyddu út í vændi. Fischer viðurkenndi nýlega að hann bæri pólitíska ábyrgð á því að ekki hefði verið nægileg festa hjá sendiráðum í útgáfu ferðamannaáritana. Þetta þykir þýskum fjölmiðlum ekki nóg því þeir segja að hann hafi vitað um gloppuna sem opnaði glæpasamtökum leið til Vestur-Evrópu ári áður en hann greip til aðgerða og vilja skýringar á því. Upphafið að því að glæpamenn fóru að nýta sér ferðamannaáritanir er rakið til ákvörðunar Fischer í mars 2000 um að liðka fyrir útgáfu ferðamannaáritana. Með þessu kom hann til móts við óskir félaga sínum í þýska Græningjaflokknum. Undirráðherra hans Ludger Volmer undirritaði tilskipunina og sagði á dögunum af sér vegna þess.