Óttast að nýr stofn breiðist út

Nýr og ógnvekjandi stofn HIV-veirunnar var greindur í New York í síðustu viku. Engin lyf virðast duga á veiruna og hún leiðir til alnæmis mun hraðar en þekkst hefur hingað til. Óttast er að nýr stofn lyfjaónæmrar HIV-veiru breiðist nú út. Tíðindin hafa valdið nokkrum usla, einkum í New York þar sem afbrigðið fannst. Það var maður á fimmtugsaldri sem greindur var en hann hafði haft mök við hundruð annarra karlmanna án þess að nota verju. Því er hættan á að veiran hafi breiðst út töluverð. Sérfræðingar þar í borg segja hugsanlegt að hér sé um mikinn vanda að ræða. Þau lyf, sem hingað til hafa getað slegið á veiruna, duga ekki gegn þessu afbrigði auk þess sem það leiðir til alnæmis á mun skemmri tíma en þau afbrigði HIV-veirunnar sem þekkst hafa hingað til. Maðurinn er talinn hafa veikst á tveimur mánuðum en hingað til hefur tekist að halda veirunni niðri í allt að áratug. Þetta og lyfjaónæmið boða ekki gott, að mati bandarísku sérfræðinganna. Haraldur Briem sóttvarnalæknir segir að menn velti fyrir sér hvort um nýtt, stökkbreytt afbrigði af HIV-veirunni sé að ræða. Maðurinn sem hafi smitast hafi ekki verið í neinni lyfjameðferð þannig að hann hafi fengið veiruna frá einhverjum öðrum sem væntanlega hafi notað mikið af lyfjum. Hugsanlegt sé að þannig hafi veiran breyst og orðið ónæm eða þá að um hreina stökkbreytingu sé að ræða og nýja tegund af veirunni. Spurður hvort ástæða sé að hafa áhyggjur af málunum líkt og alnæmisfræðingar í New York hafa svarar Haraldur játandi. Sóttvarnalæknar hafi lengi haft áhyggjur af þróun sýklalyfjaónæmis bæði hjá bakteríum og veirum og þetta sé einn anginn af því. Sem betur fer sé þetta mjög sjaldæft hjá þeim sem ekki hafi verið í meðferð áður en þegar tilvik eins og þetta komi upp auki það á áhyggjur manna. Í bandarískum fjölmiðlum deila þarlendir sérfræðingar um það hvort hægt sé að draga þá ályktun að þetta afbrigði veirunnar leiði til dauða á skemmri tíma en þau sem áður hafa þekkst. Robert Gallo, einn þeirra sem uppgötvaði HIV-veiruna á sínum tíma, er til að mynda á því að engar sannanir liggi fyrir því að hér sé stökkbreytt, ónæmt afbrigði á ferð. Haraldur er engu að síður á því að rétt sé að hafa varann á. Með tímanum gæti það komið til þess að fólk sem náð hafi bata með lyfjameðferð fari að veikjast aftur. Yfirmaður heilbrigðismála í New York segir tíðindin grafalvarleg og voru um helgina gefin út fyrirmæli til allra heilbrigðisstofnana um að taka þá sem nýlega voru greindir til nánari skoðunar til að ganga úr skugga um að þeir séu ekki með þetta nýja afbrigði. Finnist fleiri sýktir af sama afbrigði er ljóst að hættan á faraldri er margföld. Þó að þessi nýi stofn HIV-veiru hafi ekki greinst hér á landi segir Haraldur Briem fulla ástæðu til að vera á verði og leggur áherslu á smokkinn og skynsemi. Þannig megi forðast bæði HIV-smit og fleiri kynsjúkdóma.