Ísraelar vilja láta vísa Írönum úr SÞ

Ríkisstjórnir landa heims fordæmdu ummæli Íransforseta um að þurrka ætti Ísrael út af heimskortinu. Lítið var þó um beinar undirtektir við kröfu Ísraela um að gera ætti Íran brottrækt úr Sameinuðu þjóðunum fyrir vikið.

"Frá stofnun Sameinuðu þjóðanna 1945 hefur það aldrei komið fyrir að handhafi ríkisvalds eins aðildarríkis SÞ hafi opinberlega krafist útrýmingar annars aðildarríkis," sagði Shimon Peres, aðstoðarforsætisráðherra Ísraels í útvarpsviðtali. "Viðlíka hneyksli hefur aldrei komið upp og það er ómögulegt að horfa framhjá þessu," sagði hann.

Peres sagðist ekki viss um hvort afstaða Ísraelsmanna gagnvart Íran myndi hafa einhverja framgöngu, en að henni yrði að halda fram.

Talsmaður utanríkisráðuneytis Ísraels, Mark Regev, sagði að Ísraelar hefðu mótmælt yfirlýsingum Írana á fundi Sameinuðu þjóðanna á miðvikudag en ekki hefði enn verið ákveðið hvort krefjast ætti þess opinberlega að Írönum yrði vikið úr SÞ.