Fuglaflensa greinist aftur í Kína

Fuglaflensu hefur aftur orðið vart í Kína, í þetta sinn á meðal aligæsa í Anhui-héraði í austurhluta landsins. Talsmaður Matvælahjálpar Sameinuðu þjóðanna greindi frá því í dag að tvö þúsund og eitt hundrað fuglar hefðu sýkst af veirunni, 550 hefðu drepist og að 45 þúsund fuglum hefði verið slátrað. Engar fregnir hafa þó borist af því að veiran hafi borist í fólk á svæðinu en menn hafa engu að síður miklar áhyggjur af málinu.

Fuglaflensa kom upp í vesturhluta Kína í júlí síðastliðnum en með því að slátra fjölmörgum fuglum og setja svæðið í sóttkví tókst að hemja útbreiðslu veikinnar á nokkrum vikum.