Kominn til Flórída

Fellibylurinn Wilma mjakaði sér frá Mexíkó til Flórídaríkis í Bandaríkjunum í gær. Íbúar á hættusvæðum hafa flestir haft sig á brott. "Bærinn sem við búum í er núna eins og draugabær, það eru allir farnir. Hér er samt núna 28 stiga hiti og sólskin og þægileg hafgola. Eftir nokkrar klukkustundir skellur hins vegar veðrið hérna á. Við erum að fara að forða okkur til Fort Lauderdale," sagði Ingvi Hrafn Jónsson fréttamaður sem staddur var á í Key Largo, syðst í Flórída, síðdegis í gær.

Reiknað var með að Wilma tæki land aðfaranótt mánudagsins en engu að síður hafa íbúar hættusvæðanna notað síðustu daga til að forða sér af vettvangi. "Allir vinir okkar á þessu svæði eru farnir í skjól til ættingja og vina eins norðarlega sem þeir komast. Það er hellingur af fólki sem er orðinn þreyttur. Þetta eru fjórðu fyrirmælin frá alríkisstjórninni um að fara á brott," bætti Ingvi Hrafn við. Wilma er 22. Atlantshafsfellibylurinn sem myndast þetta árið en engin dæmi eru um slíkan fjölda síðan skipulagðar veðurmælingar hófust.