Móðir náttúra er óblíð

Algert upplausnarástand virðist ríkja á hamfarasvæðunum í sunnanverðum Bandaríkjunum. Gripdeildir og aðrir glæpir eru orðnir svo illviðráðanleg að sett hafa verið herlög í New Orleans til að stemma stigu við vargöldinni. Drykkjarvatn er á þrotum, 2,3 milljónir manna eru án rafmagns og hætta er talin á að sjúkdómar breiðist út. Margir mánuðir eru sagðir þangað til að íbúar New Orleans fái að snúa aftur til síns heima og í bænum Slidell í Loisiana er talið er að níutíu prósent íbúðarhúsa séu annað hvort mikið skemmd eða gjörónýt. Efnahagslegra áhrifa hamfaranna mun gæta um allan heim. Enn sem komið er hafa stjórnvöld verið treg til að gefa upp hversu margir hafa látið lífið en leggja þess í stað áherslu á björgunarstarfið. Vitað er að ellefu manns biðu bana í Flórída þegar Katrín gekk þar á land í síðustu viku og staðfest hefur verið að 185 hafi týnt lífi í Mississippi. Ray Nagin, borgarstjóri New Orleans, býr sig undir hið versta. "Við vitum af mörgum líkum fljótandi í vatninu og af öðrum látnum uppi á háaloftum. Ég óttast að í það minnsta hundruð hafi farist, líklegast þúsundir." @.mfyr:Jarðskjálftar og flóðbylgjur @megin:Síðustu árin hafa náttúrhamfarir af ýmsu tagi dunið yfir heiminn með tilheyrandi mannfalli og tjóni á munum. Eins og sjá má af meðfylgjandi korti eru jarðskjálftar eru sú tegund hamfara sem alvarlegastar afleiðingar hefur en flóð koma þar á eftir. Þegar þetta tvennt fer saman, jarðskjálftar og flóðbylgjur í kjölfar þeirra, verður skaðinn geigvænlegur. Þannig er jarðskjálftinn á Súmötru og flóðbylgjan í kjölfar hennar á öðrum degi jóla í fyrra einhverjar verstu náttúruhamfarir sögunnar, ríflega þrjú hundruð þúsund manns týndu lífi í þeim hörmungum. Flóð eru nánast árviss viðburður í sunnanverðri Asíu þegar monsúnrigningarnar standa yfir. Hið sama má segja um fellibylji sem ganga inn á Mexíkóflóa af Atlantshafi, tugþúsundir hafa beðið bana í slíkum fárviðrum á undanförnum árum. Skýstrokkar, stórhríð og skógareldar valda jafnan miklum spjöllum en stórfellt manntjón er fátítt við slíkar aðstæður. Athygli vekur að fáir virðast hafa dáið í eldgosum á síðastliðnum árum og þarf að leita til ársins 1985 til að finna verulega mannskætt eldgos. Þá fórust 23.000 íbúar Armero-borgar þegar jökulhetta Nevado del Ruiz fjalls í Kólumbíu bráðnaði vegna goss og flæddi yfir bæinn. Hátt í hálf milljón manna hefur týnt lífi í þeim hörmungum sem hér hafa verið taldar en vitaskuld snarhækkar sú tala ef allar smærri hamfarir bætast við, svo ekki sé minnst á hungursneyðir og aðrar þrengingar sem af óáraninni getur leitt.