Djammið hafið í Eyjum

Yfir fimmtán hundruð manns eru komin til Vestmannaeyja en húkkaraballið fræga verður haldið þar í kvöld. Fá tjöld voru komin upp á Akureyri í dag en í Galtalæk eru komnir um 500 gestir. Veðurfræðingar spá mildu veðri en samt einhverri vætu um helgina. Flestir þeirra þjóðhátíðargesta sem komnir eru til Eyja gista í heimahúsum að sögn kunnugra, en þó voru nokkur tjöld kominn upp í Herjólfsdal. Hrafn Jónasson var að koma í fyrsta sinn á Þjóðhátíð og hann ætlar á ball í kvöld. Hann sagðist ætla á Húkkaraballið og ná sér í dömu og reiknaði með að skemmta sér mjög vel á Þjóðhátíðinni. Ingibjörg Karsldóttir ætlaði líka á Húkkaraballið því allir segja að það sé svo rosalega skemmtilegt. Herjólfur kom síðdegis til Vestmannaeyja með um 500 manns og níu vélar á vegum Flugfélags Íslands fóru til Eyja í dag en á morgun verða þær átján. Ingibjörg Karlsdóttir, veðurfræðingur, sagði að að það yðri milt en lítill vindur og svolítið blautt. Bleytunni er reyndar misskipt, meiri væta sunnan og vestanlands en annars staðar. Hún reiknaði með að það yrði þokkalega bjart norðaustanlands og væntanlega bjart á suðaustanlands. Hún taldi Austurland hafa vinninginn þessa helgin. Á mánudaginn sagði hún að það gæti orðið blautt og hún ráðlagði fólki að taka snemma saman á mánudaginn. Ekki má gleyma smokkunum þessa stærstu skemmtanahelgi landsmanna, en í dag kynntu Samtökin 78 og Landlæknisembættið í samstarfi við ýmis samtök  herferð þar sem 50 þúsund smokkum verður dreift frítt um allt land. Í hverri pakkningu eru tveir smokkar og sleipiefni, sem er ætlað til að auðvelda samfarir. Jón Þór Þorleifsson hjá Samtökunum 78 sagði samtökin hafa heyrt af því að fólk væri orðið kærulaust og talað um að smokkarnir væru orðnir dýrir og því hafi samtökin fengið þessa hugmynd. Landlæknisembættið telur verkefnið mikilvægt og hvetur fólk til að nota smokkinn allan ársins hring. Haraldur Briem, sóttvarnalæknir, sagði það enga tilviljun að smokkum væri dreift þessa helgi því helgin er þekkt fyrir að fólk stundi kynlíf og kannski ekki alltf öruggt.