Fjör í 1.deildinni

Það var blóðug barátta á Akureyri í gær þegar erkifjendurnir í Þór og KA mættust. Hart var tekist á eins og venjulega og fengu tveir leikmenn Þórs að líta rauða spjaldið. Það nýttu KA-menn sér til fullnustu og þegar upp var staðið höfðu þeir niðurlægt Þórsarana, 6-1. KA-menn komust yfir strax á 12. mínútu með marki Húsvíkingsins Pálma Rafns Pálmasonar. Vendipunktur leiksins kom síðan á 37. mínútu þegar Egill Már Markússon dómari gaf Lárusi Orra Sigurðssyni beint rautt spjald fyrir háskalega tæklingu. Lárus Orri vissi upp á sig sökina og yfirgaf svæðið hávaðalaust. Þannig stóðu leikar í hálfleik en Þórsarar jöfnuðu óvænt í upphafi þess síðari úr vítaspyrnu. KA-menn voru fljótir að svara með öðru marki, einnig úr víti, og þegar Þórsarar misstu annan mann af velli var allur vindur úr þeim. KA-menn gengu á lagið og bættu við fjórum mörkum áður en Egill Már flautaði leikinn af. Í Víkinni var söguleg stund þegar reykvísku Víkingarnir tóku á móti Víkingunum frá Ólafsvík. Sá leikur var aldrei spennandi enda eru Reykjavíkur-Víkingar með mikið sterkara lið og þeir voru ekki í vandræðum með nafna sína frá Ólafsvík. Lokatölur 7-0 sem var síst of stór sigur. Nýliðar KS frá Siglufirði komu verulega á óvart á Kópavogsvelli með því að leggja HK að velli, 0-2. Sigur Siglfirðinga var sanngjarn og sannfærandi enda héldu þeir algjörlega aftur af sóknarleik heimamanna sem áttu eitt verulegt færi í leiknum. Það er ljóst að KS er með mun sterkara lið en menn töldu í fyrstu og verða þeir sýnd veiði en ekki gefin. HK heldur aftur á móti áfram að valda vonbrigðum en til mikils var ætlast af liðinu fyrir mótið. Völsungur frá Húsavík situr sem fastast á botni deildarinnar án stiga eftir 1-0 tap gegn Haukum. Það sem meira er þá hefur þeim ekki enn tekist að skora mark sem er ákaflega dapur árangur hjá Zorani Ljubicic og lærisveinum hans.