Sonur Sharons sóttur til saka

Dómsmálaráðherra Ísraels ákvað í gær að höfða mál á hendur syni Ariels Sharons, forsætisráðherra Ísraels. Omri Sharon er gefið að sök að hafa sett á stofn fyrirtæki erlendis sem sendi síðan fjármagn í kosningasjóði föður hans. Þá er hann einnig sakaður um frekara bókhaldssvindl og meinsæri. Í gær var einnig ákveðið að ekki yrði gefin út ákæra á hendur Ariel Sharon vegna spillingarmáls sem um tíma leit út fyrir að gæti bundið enda á stjórnmálaferil hans. Þrátt fyrir að Sharon eldri hafi sloppið segja margir að almenningur í Ísrael líti á ákærur á hendur syni hans sem ákærur á hendur forsætisráðherranum sjálfum.