Neita að framfylgja reykingabanni

Eigendur veitingahúsa og kráa á Ítalíu neita að framfylgja reykingabanni sem tekur gildi á morgun. Banninu, sem upphaflega átti að taka gildi um áramót, var frestað um nokkra daga svo ítalskir reykingamenn gætu fagnað nýju ári á krám og veitingahúsum. Markmiðið með banninu er að draga úr reykingum í landinu og binda enda á óbeinar reykingar, en árlega látast 90 þúsund manns á Ítalíu af völdum reykinga. Veitingamenn neita hins vegar að taka að sér löggæsluhlutverk og segjast ekki munu kalla til lögreglu ef gestir kveiki í sígarettu, pípu eða vindli, en sekt fyrir athæfið getur numið allt að tvö þúsund evrum eða rúmlega 160 þúsund krónum. Tæplega þriðjungur íbúa landsins, eða um 18 milljónir, er reykingafólk.