Keflavík 1-0 undir í hálfleik

Keflvíkingar eru 1-0 undir gegn Mainz í hálfleik í fyrri leik liðanna í 2. umferð Evrópukeppni félagsliða í knattspyrnu. Markið kom á 10. mínútu eftir sendingu af vinstri kanti inn í teig þaðan sem Benjamin Auer skallaði boltann yfir Ómar Jóhansson markvörð og í hægra hornið. Leikurinn hófst kl. 18:30. Keflvíkingar eiga þarna við ofurefli sitt að etja og geta þakkað fyrir að vera ekki stærra undir. Leikmenn Keflavíkur eru afar stressaðir og óöruggir fyrir framan 19.000 áhorfendur sem láta vel í sér heyra og gengur virkilega illa að halda boltanum innan liðsins. Keflvíkingar komust þó inn í leikinn í kringum 25. mínútu þegar heimamenn voru búnir að pressa stíft nær látlaust ef undan er skilið máttlaust skot Guðmundar Steinarssonar að marki heimamanna en hann fékk langa sendingu af vinstri kanti. Við fylgjumst með gangi mála í leiknum hér á Vísi og komum með tíðindi ef eitthvað gerist.