Sóknarvandræði Newcastle

Graeme Souness knattspyrnustjóri Newcastle á í stökustu vandræðum varðandi sóknarleikinn á St James' Park eftir að Michael Chopra meiddist illa í gær. Þessi U21 landsliðsmaður Englands skaðaði liðbönd á hægra hné eftir aðeins 15 mínútur í leik með varaliðinu í gær. Chopra fer í skoðun í dag og þá kemur nánar í ljós hve alvarleg þessi meiðsli eru en reikna má með því að hann verði frá í mánuð. Newcastle á fyrsa leik gegn Arsenal um helgina og er spurning hverjir verða í fremstu víglínu Newcastle í leiknum. Fyrirliðinn Alan Shearer á við meiðsli að stríða og Shola Ameobi tekur út leikbann. Reikna má með því að Souness stormi nú á leikmannamarkaðinn og leiti sér að sóknarmanni.