Segir alla sitja við sama borð

Yfir 30 áhugasamir kaupendur hafa þegar fengið eða fá á næstu dögum tilboðsgögn í tengslum við sölu Símans. Formaður einkavæðingarnefndar segir alla sitja við sama borð. Frestur til að skila inn tilboðum í Símann rennur út 6. maí næstkomandi. Fjárfestingarfélögin stóru, Burðarás og Meiður, eru meðal þeirra sem bíða eftir að fá tilboðsgögnin afhent og hafa forsvarsmenn beggja félaga þegar gengist undir trúnað vegna þess. Viðskiptaráðherra segir áhuga á fyrirtækinu gríðarmikinn og að þegar hafi 30 undirritað trúnaðaryfirlýsingu og annaðhvort fengið eða bíða eftir að fá tilboðsgögnin afhent. Forsenda þess að fá nauðsynleg gögn til að gera tilboð í Símann er að undirrita ítarlegt skjal þar sem gengist er undir trúnað. Fréttastofa Stöðvar 2 hefur heimildir fyrir því að nokkrir áhugasamir kaupendur hafi fundað með ráðgjöfum einkavæðingarnefndar hjá Morgan Stanley. Þá herma heimildir fréttastofu að talsverðs taugatitrings gæti meðal einstakra fjárfesta um að seljendur Símans mismuni væntanlegum bjóðendum. Jón Sveinsson, formaður einkavæðingarnefndar, sagði í samtali við fréttastofu að það hefði dregist í nokkra daga að ljúka við gerð tilboðsgagna til afhendingar en að öðru leyti væri ekkert sem sneri að einkavæðingarnefnd óeðlilegt í söluferlinu og að byrjað hefði verið að afhenda tilboðsgögnin í fyrradag. Jón sagði tryggt að allir sætu við sama borð en að einhverjir væntanlegir tilboðsgjafar hefðu gert athugasemdir við ákvæði trúnaðarsamninga og reynt að að fá þeim breytt. Um leið og trúnaðarsamningar lægju fyrir fengju menn gögnin send.