Lagt við hlustir

Ég hef heyrt að margir blómaeigendur tali við blómin sín. Halda því fram að þau dafni betur. Ég veit ekki hvort hægt er að nota sömu aðferð á bíla en það margborgar sig hins vegar að hlusta á þá. Ef þú lærir að þekkja hljóðin í bílnum þínum heyrir þú strax ef aukahljóð bætist við. Aukahljóð orsakast af breytingu og breytingar í bílum eru sjaldnast af hinu góða. Byrjum á einföldu dæmi. Bíllinn startar hægt (nönn...nönn...nönn...). Hljóðið vísar til rafmagnsleysis. Annað dæmi væri ójafn gangur (brumm brumm hóst brumm). Gæti bent á ranga tímastillingu á kveikju eða vitlausa eldsneytisblöndu. Ef gangurinn er hins vegar mjög grófur og ójafn (hósthóst... hóst... hóst) er mótorinn sennilega ekki að sprengja í öllum strokkum. Þá athugar maður fyrst kerti og kertaþræði. Fjórða dæmið væri svo lágvært og ákaft tikkhljóð framan úr vél (gliggliggliggliggligg...). Í sumum vélum er það eðlilegt, í öðrum tilfellum borgar sig að drepa strax á bílnum og athuga stöðu á smurolíu áður en vélin skemmist. Rétt er að taka fram að þetta hljóð getur líka bent á önnur og meiri vandamál ef það hverfur ekki við að bæta smurolíu á vélina. Önnur hljóð sem gefa til kynna að það sé komið að varahlutakaupum eru til dæmis hvinur eða niður aftan úr bílnum (nnniiiiiiiiiiii), sem er merki um afturhjólalegu sem er á síðasta snúningi, og ískur í bremsum (ÍÍÍÍÍÍÍÍÍÍÍÍÍ), sem getur til dæmis stafað af óhreinindum á bremsuklossum eða þá að klossarnir, bremsudiskarnir eða –skálarnar eru eyddar. Þegar ískrið í bremsunum er farið að breytast í surg (kkkggghrhhrrrr) eru bremsuklossarnir gjörsamlega búnir og ekki öruggt að keyra bílinn neitt nema á næsta verkstæði. Síðasta dæmið á þessum stutta og ótæmandi lista er gelt frá hjólum bílsins þegar þú keyrir í holur (bonk!) en það stafar oft af ónýtum dempurum. Næst þegar þú ert að keyra skaltu slökkva á útvarpinu og hlusta á bílinn þinn. Lærðu að þekkja öll hljóð í bílnum þegar hann er í lagi. Þá er ekki ólíklegt að þú komir "eyra" á bilun áður en hún fer að hafa veruleg áhrif. Það getur sparað þér tíma á verkstæði og stórar fjárhæðir.