Saka Sharon um valdníðslu

Kosningabaráttan fyrir þingkosningarnar í Ísrael í vor er þegar hafin. Stuðningsmenn Ariels Sharon forsætisráðherra, sem í fyrradag klauf Likud-bandalagið, ítrekuðu í gær markmið hins nýja flokks um að friðarsamkomulagi við Palestínumenn yrði náð og þeir fengju að stofna sjálfstætt ríki.

Fyrrum félagar Sharons í Likud-bandalaginu vönduðu honum hins vegar ekki kveðjurnar í gær. Benjamín Netanyahu, fyrrverandi forsætisráðherra og líklegur eftirmaður Sharons, sagði hann einræðisherra sem skildi ekki lýðræði og nýi flokkurinn væri fullur af strengjabrúðum.