Ætlar ekki að beita valdi

Russel L. Honore hershöfðingi sem stjórnar aðgerðum Bandaríkjahers við rýmingu New Orleans segir að hermenn hans muni ekki beita valdi til að fá íbúa borgarinnar í burtu. Hann sagði í gær að hlutverk hersveita hans væri að færa bágstöddum mat og vatn og útvega sem flestum húsaskjól, það væri í verkahring annara, svo sem borgaryfirvalda og stjórnar ríkisins að rýma borgina. "Alríkishermenn munu ekki taka þátt í beinum brottflutningi íbúa á nokkurn hátt," sagði Honore í samtali við fréttamann CNN. Þúsundir íbúa borgarinnar neita að fara að skipunum um að rýma borgina. Ray Nagin, borgarstjóri New Orleans, hefur gefið leyfi sitt fyrir því að þeir íbúar sem neita að fara sjálfviljugir verði reknir á brott með valdi. Helsta verkefni björgunarsveita er nú, fyrir utan að rýma borgina, að leita uppi lík þeirra sem fórust þegar fellibylurinn Katrín sökkti borginni í sæ. Blaðaljósmyndurum hefur verið bannað að fylgjast með þeim aðgerðum.