Júsjenkó öruggur sigurvegari

Viktor Júsjenkó bar sigur úr býtum í forsetakosningunum í Úkraínu sem haldnar voru annan dag jóla. Kjörsókn var góð og ekki eru taldar líkur á að brögð hafi verið í tafli. Stuðningsmenn Viktors Janukovitsj eru ósáttir við úrslitin og óttast að misrétti í landinu muni aukast. Úkraínumenn gengu að kjörborðinu á nýjan leik á sunnudaginn en hæstiréttur landsins ógilti kosningarnar sem haldnar voru í síðasta mánuði þar sem framkvæmd þeirra var meingölluð. Kjörsókn var góð en ríflega 77 prósent skráðra kjósenda nýtti atkvæðisrétt sinn. Þegar 97 prósent atkvæðanna höfðu verið talin höfðu tæp 53 prósent greitt Júsjenkó atkvæði sitt en rúm 43 prósent merkt við nafn Janukovitsj. Munurinn á frambjóðendunum var minni en gert hafði verið ráð fyrir. Útgönguspár sýndu allt að tuttugu prósentustiga mun á frambjóðendunum en þegar talið hafði verið upp úr kössunum nam hann ekki nema tíu prósent. Engu að síður var Júsjenkó ánægður með úrslitin. Í ávarpi sínu til þjóðarinnar þakkaði hann stuðningsmönnum sínum sem vikum saman höfðust við úti á torgum og strætum höfuðborgarinnar í vetrarkuldunum og mótmæltu úrslitum fyrri kosninganna. "Í dag hefur úkraínska þjóðin sigrað, ég óska ykkur til hamingju," sagði hinn rúnum risti leiðtogi við mannfjöldann á aðaltorgi Kænugarðs í fyrrakvöld. "Við höfum verið sjálfstæð í fjórtán ár en ekki verið frjáls. Nú getum við hins vegar horft fram á veginn því Úkraína hefur öðlast fullveldi og frelsi" Tólf þúsund kosningaeftirlitsmenn voru í Úkraínu til að tryggja að kosningarnar færu rétt fram. Þeim bar saman um að kosningarnar hefðu farið heiðarlega fram og allir hnökrar hefðu verið minniháttar. Janukovitsj var orðinn svartsýnn um sigur áður en kjörfundi lauk en lofaði öflugri stjórnarandstöðu. Stuðningsmenn hans höfðu í frammi mótmæli, til dæmis í iðnaðarborginni Donetsk og sögðust óttast að klofningurinn á milli þjóðarbrotanna í landinu myndi aukast. Margir þeirra kváðust styðja að hinn rússneskumælandi austurhluti landsins klyfi sig frá vesturhlutanum.