Óttast að farsóttir breiðist út

Yfir tuttugu og eitt þúsund manns eru taldir af eftir flóðin og jarðskjálftana í Suðaustur-Asíu í gær. Óttast er að farsóttir breiðist nú út en flóðavatn mengar vatnsból og lík þeirra sem fórust rotna á víðavangi. Þúsundir hafa verið grafnar í fjöldagröfum og með öllu er óljóst hverjir þar liggja. Tala þeirra sem fórust mun án efa hækka í dag þar sem þúsunda er ennþá saknað en björgunarmenn leita nú líka í rústum heimila og hótela og á hafi úti. Kraftur flóðöldunnar var slíkur að jafnvel hefur þurft að veiða lík ofan úr trjám. Staðfest er að ríflegatuttugu og eitt þúsund eru af frá Indlandi til Indónesíu. Við þetta bætast hundar og kettir, búfé og fiskar sem liggja eins og hráviði út um allt. Fnykurinn er á stöðum sagður óbærilegur og óttast að farsóttir breiðist út. Vatnsból eru menguð og heilbrigðisstofnanir, þar sem þær eru til staðar, eru engan vegin í stakk búnar að takast á við hörmungarnar. Hjálparstofnanir hraða nú neyðargögnum og starfsfólki á svæðið sem verst urðu úti og telja sérfræðingar Alþjóða Rauða krossins þörf á neyðarhjálp upp á tæplega fimmhundruð milljónir króna. Einna verst er ástandið á Sri Lanka þar sem allt að fimmtán metra há flóðaldan skall á ströndinni þar sem hundruð þúsunda búa. Aðrar eins náttúruhamfarir hafa aldrei áður gengið yfir eynna og því eru yfirvöld með öllu ófær um að eiga við vandann. Flóðaldan eirði engu. Tíu metra há bylgja réðst með miklum hraða á strendur landanna og æddi allt að kílómetra inn á land. Hún bar með sér hús og kofa, bíla og allt annað sem varð á vegi hennar. Bílar þeyttust inn í anddyri hótela og þeir sem voru á ströndinni soguðust á haf út. Aðrir voru, samkvæmt fréttaskeytum, nánast kramdir og þar sem aldan var kröftugust, á hafi úti, brytjaði hún fiskibáta í spað. Þar var aldan allt að þrjátíu metra há og á ríflega níuhundruð og fimmtíu kílómetra hraða. Hún mölvaði báta og olli flóðum eftir austurströnd Afríku, sex þúsund kílómetra í burtu. Mannfallið var eftir því: á Sri Lanka segja yfirvöld yfir tíu þúsund hafa farist, átta hundruð þúsund misstu heimili sín; á Indlandi er talan komin upp í ríflega sex þúsund, þar af 200 útlendingar; í Indónesíu fórust í það minnsta fjögur þúsund og níuhundruð; á Taílandi ríflega átta hundruð, langflestir erlendir ferðamenn. Nokkrir tugir týndu lífi í Malasíu, Myanmar og Bangladesh. Óljósar fregnir berast frá Maldív-eyjum. Nú liggur fyrir að skjálftinn var níu á Richter en ekki 8,9 eins og fyrst var talið. Nokkrir eftirskjálftar hafa orðið og öldugangur er enn nokkuð óreglulegur, sem vakið hefur ugg eftirlifandi, en sérfræðingar segja litlar eða engar líkur á að önnur eins flóðbylgja myndist og gangi yfir svæðið.