23.500 látnir á hamfarasvæðunum

23.500 manns hafa látist í kjölfar jarðskjálftans í Suðaustur-Asíu í gær samkvæmt Sky-sjónvarpsstöðinni. Mannfallið er mest á Sri Lanka en þar eru rúmlega 10 þúsund manns taldir af. Vitað er um a.m.k. fimm Norðmenn, þrjá Dani og tvo Svía sem létust í hamförunum.   Fréttastofa Bylgjunnar náði fyrir stundu tali af Konráð Magnússyni sem var ásamt konu sinni og yfir 200 manns kominn um borð í flugvél á Maldív-eyjum þegar ósköpin dundu yfir. Farþegum var skipað að yfirgefa vélina í skyndingu og halda inn í flugstöðina og síðan varð allt um flotið og hálfs metra djúpt vatn varð á flugbrautinni. Þegar vatnið sjatnaði tók það stórvirkar vinnuvélar átta klukkustundir að hreinsa eina flugbraut þannig að vélar á vellinum kæmust á brott. Konráð er nú á Sri Lanka á svæði sem ekki varð fyrir barðinu á hamförunum en í næsta nágrenni fórust nokkur þúsund manns. Eins og áður sagði varð Sri Lanka verst úti í hörmungunum. Skjálftinn og flóðbylgjurnar sem hann olli eru mestu náttúruhamfarir á þessari öld. Búast má við því að tala látinna haldi áfram að hækka. Hundruð þúsundir manna hafa misst heimili sín og óttast menn nú að hungursneyð og farsóttir kunni að brjótast út á svæðinu. Alþjóðlegt hjálparstarf hófst strax í gær á hamfarasvæðinum en svæðin eru mjög fjölmenn. Hermenn og hjálparstarfsmenn vinna hörðum höndum að því að hlúa að slösuðum á svæðunum og eru spítalar yfirfullir af fólki. Skjálftinn átti upptök sín skammt vestur af eyjunni Súmötru í Indónesíu. Á þeim slóðum mætast jarðflekar þar sem svonefndur Indó-Ástralíufleki gengur undir Evrasíuflekann með tilheyrandi umbrotum. Skjálftinn var 8,9 stig á Richter-kvarða og námu jarðskjálftamælar hann um allan heim, meðal annars hér á landi. Við jarðskjálftann lyftist sjávarbotninn þannig að gífurlegar flóðbylgjur mynduðust og fóru um sex metra háar, sumar allt að tíu metrar, á ógnarhraða yfir Indlandshaf. Þær brotnuðu svo á strandlengjum landanna beggja vegna Bengalflóa. Í Indónesíu, Sri Lanka og á Indlandi skoluðust heilu þorpin á braut, sóldýrkendur bárust á haf út og snorkkafarar lömdust yfir kóralrif í túristalendum Taílands. Á Maldív-eyjum, eyjaklasa suður af Indlandi sem er um 2.500 kílómetra frá upptökum skjálftans, varð mikið tjón en eyjarnar rísa hvergi hærra en 1,8 metra yfir sjávarmál. Neyðarvakt var komið á í utanríkisráðuneytinu í gær vegna íslensks ferðafólks sem er á ferð í Asíu og setti fjöldi ættingja sig í samband við ráðuneytið til þess að spyrjast fyrir um afdrif Íslendinga sem staddir eru á hamfarasvæðunum. Ekki er vitað til þess að Íslendingar hafi skaðast í flóðunum, en í gærkvöld hafði þó ekki náðst í nokkurn hóp fólks ennþá. Á lista ráðuneytisins yfir Íslendinga á þessum slóðum voru um 65 manns. Símasamband við hamfarasvæðin var stopult, en í utanríkisráðuneytinu fengust þær upplýsingar að reynt yrði að aðstoða fólk eftir megni í gegnum ræðismenn á viðkomandi stöðum eða norrænu utanríkisþjónustuna. Fregnir bárust þó af því að stöku ferðamenn hafi verið hætt komnir og mörgum var mjög brugðið. Talsvert er af erlendum ferðamönnum á skjálftasvæðunum og er fjölmargra saknað.