Hansína verður bæjarstjóri

Framsóknarmenn í Kópavogi samþykktu á fundi sínum í gærkvöldi að Hansína Ásta Björgvinsdóttir verði næsti bæjarstjóri í Kópavogi, í stað Sigurðar Geirdal, sem lést nýverið. Fyrr í vikunni höfðu Sjálfstæðismenn fallist á þá tilhögun. Bæjarstjórn mun staðfesta þetta formlega á næsta fundi sínum á milli jóla og nýárs og tekur Hansína Ásta við embættinu um áramót. Hún er 58 ára, kennari að mennt, og hefur verið bæjarfulltrúi Framsóknarflokksins síðan 1998 og varabæjarfulltrúi frá 1994.