Sigurganga Miami heldur áfram

Miami Heat hélt áfram sigurgöngu sinni í NBA-körfuboltanum í gær. Miami sigraði Boston Celtics með tveggja stiga mun, 106-104. Dwayne Wade skoraði 25 stig fyrir Miami og Shaquille O´Neal 21 og hirti 13 fráköst en þetta var níunda tvenna O´Neals á leiktíðinni. Þá hitti hann úr öllum níu skotum sínum í leiknum. Larry Huges hjá Washington Wizards náði hins þegar þrefaldri tvennu því hann skoraði 33 stig, hirti 10 fráköst og gaf 10 stoðsendingar þegar Washington sigraði Toronto 114-109 í framlengdum leik. Koby Bryant skoraði 20 stig fyrir Los Angeles Lakers sem sigruðu New Orelans Hornets 89-76. Los Angeles Clippers skelltu Golden State 103-91, Portland sigraði New Jersey Nets 81-71, Seattle sigraði Indiana 103-95 og Kevin Garnett skoraði 28 stig fyrir Minnesota sem skellti Sacramento 121-110.