Arafat allur

Jasser Arafat, leiðtogi Palestínumanna, er allur, sjötíu og fimm ára að aldri. Hann lést á sjúkrahúsi í París skömmu eftir miðnætti að íslenskum tíma en frá þessu var greint snemma í morgun. Flogið verður með lík Arafats til Kaíró síðar í dag þar sem opinber útför hans fer fram, og síðar verður hann jarðsettur í Ramallah. Ísraelsk stjórnvöld þvertaka fyrir að hann verði jarðsettur í Jerúsalem, þar sem hann vildi verða jarðsettur, og sagði dómsmálaráðherra Ísraels borgina greftrunarstað ísraelskra konunga, ekki palestínskra hryðjuverkamanna. Andlát Arafats kom ekki á óvart en hann hefur legið á sjúkrahúsi í París í um hálfan mánuð, stóran hluta þess tíma í dái. Í nótt er hermt að helstu líffæri hans hafi gefið sig. Almenningur í Palestínu var við andlátinu búinn en forysta Palestínumanna er í uppnámi, enda hafði Arafat gert sitt ítrasta til að grafa undan hugsanlegum eftirmönnum. Hersveit gamalla samstarfsmanna deilir nú við nýja og upprennandi leiðtoga um völdin. Rawhi Fattuh, forseti palestínska þingsins, verður forseti til bráðabirgða en kjósa verður í embættið innan sextíu daga.