Tugir látnir og fjölmenni í hættu

Kúbverjar bjuggu sig í gær undir miklar hamfarir en búist var við að fellibylurinn Ívan, sem hefur fengið viðurnefnið grimmi eftir samnefndum rússneskum keisara, gengi yfir eyna í gærkvöld eða í nótt. Þá hafði fellibylurinn, einn sá öflugasti sem hefur riðið yfir Karíbahaf frá því mælingar hófust, nýlega látið til sín taka á Cayman-eyjum. Ívan olli minni skemmdum á Cayman-eyjum en víða annars staðar þar sem hann hefur gengið yfir. Ástæðan er sú að húsnæði þar þolir mun meiri ágang en víða á fátækari eyjum Karíbahafsins. Þó bárust víða að fréttir af því að fellibylurinn hefði feykt þökum af húsum og að flætt hefði inn í hús. Talið er að milli fjórðungur og helmingur húsa á eyjunum hafi orðið fyrir skemmdum þegar fellibylurinn gekk yfir. Svo virðist sem íbúar Cayman-eyja hafi sloppið við mannfall af völdum fellibylsins. Því hefur verið öðruvísi farið annars staðar þar sem hann hefur gengið yfir eða teygt anga sína. Í það minnsta fimmtán létust á Jamaíka og nær 40 á Grenada. Fimm létu lífið af völdum fellibylsins í Venesúela, einn á eynni Tobago og annar á Barbados. Fjögur börn létu lífið í Dóminíska lýðveldinu. Yfirvöld á Kúbu ráðlögðu 1,3 milljónum manna að yfirgefa heimili sín áður en fellibylurinn kæmi til Kúbu. Á vesturhluta eyjunnar kepptist fólk við að taka saman helstu nauðsynjar áður en það hélt á brott til að leita sér öryggis "Það fyllir mig depurð að yfirgefa heimili mitt en ég verð að vernda sjálfan mig og bjarga lífum fjölskyldu minnar," sagði sjómaðurinn Ricardo Hernandez.