Sautján létust í eldsvoða í námu

Sautján námamenn létust þegar eldur braust út í koparnámu í Kastamonuhéraði í norðurhluta Tyrklands. Níu námamönnum sem lokuðust inni í námunni þegar eldurinn braust út var bjargað úr henni eftir að björgunarmönnum tókst að slökkva eldana. Allir voru þeir meira eða minna slasaðir. Einhverra var þó enn saknað síðla í gær og unnið að því að bjarga þeim. "Ég var fastur neðanjarðar í þrjá tíma og var mjög hræddur," sagði Ali Cinar, einn þeirra sem sluppu lifandi úr eldsvoðanum. "Ég get ekki lýst því hve hamingjusamur ég er," sagði hann um björgun sína.