Þrjú vopnuð rán á 14 dögum

Bankaræningjarnir þrír sem voru handteknir skömmu eftir að hafa rænt peningaflutningabíl á Akers bryggju í Osló eru allir meðlimir í vafasömum samtökum eða klíkum samkvæmt norska dagblaðinu Aftenposten. Ránið er þriðja vopnaða ránið í Noregi á tveimur vikum. Lögregan hefur ekki viljað veita neinar upplýsingar mennina en samkvæmt Aftenposten er einn þeirra í nýnasistasamtökunum "Boot Boys," annar í véhjólaklíkunni Bandidos og sá þriðji í Tveita-genginu sem kennt er við innflytjendahverfið í Osló. Ránið var framið skömmu eftir miðnætt á sunnudaginn. Vegfarendur létu lögregluna vita að þrír grímuklæddir og vopnaðir menn væru að ræna peningaflutningabíl og kom hún skömmu síðar á vettvang. Þá voru mennirnir á flótta. Tveir þeirra náðust fljótt og sá þriðji sem hafði falið sig í sundinu milli Aker og Tjuvholmen náðist aðeins seinna. "Hann hafði falið sig í sjónum í nokkra stund og virtist bara vera sáttur þegar við veiddum hann upp," sagði lögreglumaðurinn Geir Kristiansen í samtali við Aftenposten. Vitni segja að lögreglan og ræningjarnir hafi skipst á skotum en enginn slasaðist. Lögreglan segir að mennirnir hafi haft töluverða fjármuni á brott með sér en hún vildi ekki segja hversu mikla. Thomas "Rocco" Hansen, norsk klámmyndastjarna, sem var að taka upp klámmynd í íbúð skammt frá ránsstaðnum í fyrrinótt náði öllu á myndband. "Við heyrðum mikinn hávaða úti og þegar við litum út sáum við sáum við bílstjóra flutningabílsins liggjandi á götunni og mann að hlaupa á brott," sagði Rocco í viðtali í Norska ríkisútvarpinu. Hann sagði að myndbandinu, sem er klukkustundar langt, hefði strax verið komið í hendur lögreglunnar. Rocco vildi lítið tjá sig við norska fjölmiðla í gær. Í viðtali við netútgáfu dagblaðsins Verdens gang sagðist hann verið tilbúin að selja þeim söguna á 150 þúsund krónur. Þá sagði hann að þær gætu fengið afrit af myndbandinu fyrir 200 þúsund. Ránið í Osló var fjórða vopnaða ránið sem framið er Noregi síðan í apríl þegar bankaræningjar skutu einn lögreglumann til bana í Stavangri. Sextánda ágúst kom til skotbardaga milli lögreglunnar og tveggja bankaræningja í Jessheim fyrir norðan Osló og 22. ágúst réðust vopnaðir ræningjar inn í Munch-safnið í Osló og rændu gríðarlega verðmætum málverkum eftir listmálarann Edvard Munch. Norðmenn, þar með talið lögreglan, hefur miklar áhyggjur af aukinn vopnaeign norskra glæpamanna og ekki síst vilja þeirra til að nota vopnin.