Alvarlegt umferðarslys skyggði á

Kona er í öndunarvél og karlmaður á gjörgæslu eftir alvarlegt umferðarslys sem varð á Suðurlandsvegi rétt fyrir fjögur í gærdag. Umferðin gekk að öðru leyti vel og urðu ekki önnur alvarleg slys en lögreglan um allt land hélt uppi öflugri gæslu. Í umdæmi lögreglunnar í Borgarnesi voru 130 ökumenn teknir fyrir of hraðan akstur um helgina. Ein nauðgun var kærð á Akureyri og tæplega eitt hundrað fíkniefnamál komu upp á Akureyri og Vestamannaeyjum. Málin voru 46 á Akureyri og einu færra í Eyjum. Fjölmennasta hátíðin var á Akureyri þar sem sextán þúsund gestir sóttu bæinn heim á hátíðina Ein með öllu um helgina. Í Vestmannaeyjum voru gestir hátt í tíunda þúsund og segja vanir þjóðhátíðargestir að aldrei hafi jafnmargir safnast í brekkuna fyrir framan aðalsviðið á laugardagskvöldi eins og nú þegar Egó, hljómsveit með Bubba Morthens í fararbroddi, kom saman eftir áratuga hvíld. Straumurinn lá norður heiðar þar sem hátíðarnar voru fjölmennastar og voru um tíu þúsund manns saman komnir á Landsmóti ungmenna á Sauðárkróki og á fjórða þúsund manns á Siglufirði.