Raunveruleikinn tæklaður

Strákarnir okkar nefnist nýjasta kvikmynd Róberts Douglas en upptökur á henni hefjast strax eftir verslunarmannahelgi. Myndin fjallar um atvinnumann í fótbolta sem kemst að því að hann er samkynheigður og kemur út úr skápnum. Hann hefur fengið sig fullsaddan af atvinnumennskunni þar sem hann fær ekki að vera hann sjálfur og kemst í samband við fleiri homma sem saman stofna eigið utandeildarlið. Sagan segir einnig frá því hvernig fjölskyldan tekur opinberun kynhneigðar hans, barnsmóðurinni sem eitt sinn var ungfrú Ísland en nú er orðin drykkfelld og syni hans sem ekki stendur sig í skólanum. Að sögn leikstjórans koma hugmyndirnar úr hverdagsleikanum. "Ég hef gaman af því að tækla raunveruleikann og sjá húmorinn í honum. Það heillar mig að geta séð húmorinn í aðstæðunum án þess endilega að gera grín. Þetta snýst ekki bara um harmleik." Björn Hlynur Haraldsson fer með aðalhlutverkið í myndinni en hann hefur áður leikið í Vesturportsuppsetningunni á Rómeó og Júlíu, Brim og fleiru. Meðal annarra sem bregða fyrir í Strákunum okkar eru Helgi Björnsson, Lilja Nótt, Maríus Sverrisson og Felix Bergsson sem leikur formann utandeildarinnar og dómara en hann lék einnig formann húsfélagsins í fyrstu mynd Róberts, Íslenska draumnum. Nú styttist óðfluga í upptökur á myndinni sem unnið hefur verið að í langan tíma. Til að hrista saman hópinn hafa verið skipulagðar fótboltaæfingar, tökulið gegn leikurum, því myndin snýst jú að hluta til um fótbolta. Leikurinn í síðustu viku var æsispennandi og endaði 10-9, tökuliðinu í hag. "Nú eru leikararnir svo tapsárir að þeir mæta allir með tölu í kvöld og reyna að bæta þetta upp," segir leikstjórinn áður en hann skellir sér á völlinn í blóðugan bardaga við komandi kvikmyndastjörnur.