Gunnar Heiðar skoraði gegn Real Madrid

Gunnar Heiðar Þorvaldsson skoraði þegar Hannover sigraði Real Madrid í vináttuleik í kvöld, 3-0. Gunnar Heiðar skoraði annað markið í leiknum á 63. mínútu eftir að hafa komið inn á sem varamaður, en hann hefur verið á skotskónum á undirbúningstímabilinu og var þetta fjórða markið sem að hann skorar í mánuðinum. 49 þúsund áhorfendur voru á leiknum.

Íslendingaliðin stóðu sig vel um helgina á æfingamóti

Leikið var í Hummel Charity Cup um helgina í Þýskalandi, en mótið er sex liða æfingamót. Þrjú úrvalsdeildarlið frá Þýskalandi, eitt frá Danmörku og tvö þýsk neðrideildarlið tóku þátt. Flensborg-Handewitt, lið Alexander Petterson og Einars Hólmgeirssonar, vann mótið eftir að hafa sigrað Lemgo, lið Loga Geirssonar, í úrslitaleiknum, 21-15.

Tottenham kaupir Boateng frá Hertha Berlin

Tottenham hefur tryggt sér hinn tvítuga Þjóðverja Kevin-Prince Boateng frá Hertha Berlin. Tottenham hefur verið á eftir leikmanninum í nokkurn tíma en hafa nú haft betur í kapphlaupi við önnur lið. Boateng er af mörgum talinn einn besti ungi miðjumaðurinn í Evrópu. Kaupverðið er talið vera um 5,4 milljónir punda.

Manchester United selur Rossi til Villareal

Manchester United hefur selt ítalska framherjann Giuseppe Rossi til spænska liðsins Villareal. Mikið hefur verið rætt um framtíð Rossi á Old Trafford í kjölfar þess að hann stóð sig mjög vel hjá Parma á síðasta tímabili þar sem hann var á láni. Rossi á eftir að gangast undir læknisskoðun en talið er að gengið verði frá kaupunum í lok vikunnar. Villareal borgar um 6,7 milljónir punda fyrir leikmanninn.

Stuðningsmenn West Ham ánægðir með að Eiður sé orðaður við félagið

Stuðningsmenn West Ham hafa keppst um að lofa Eið Smára Guðjohnsen á stuðningsmannasíðum sínum á vefnum í dag í kjölfar frétta sem bárust í gær um að landsliðsfyrirliðinn væri opinn fyrir að ganga til liðs við West Ham. Þegar rýnt er í skoðanir þeirra sést að þeir sjá Eið Smára sem heimsklassaleikmann sem væri kjörinn fyrir liðið.

Eiður Smári fer ekki til Asíu með Barcelona

Eiður Smári Guðjohnsen mun ekki ferðast með Barcelona til Asíu í æfingaferð vegna meiðsla á hné. Landsliðsfyrirliðinn missti einnig af æfingaferð Barcelona til Skotlands í síðustu viku. Carlos Puyol og Edmílson eru einnig meiddir og fara því ekki með til Asíu. Þar að auki eru Lionel Messi, Rafa Márques og Gabi Milito enn í frí vegna þátttöku þeirra í Suður-Ameríkukeppninni.

Brasilía sækir um að halda heimsmeistaramótið árið 2014

Brasilíska knattspyrnusambandið hefur sótt um að fá að halda lokakeppni heimsmeistaramótsins árið 2014. Sambandið skilaði 900 blaðsíðna skýrslu til FIFA í morgun en neitaði að svara spurningum fjölmiðla. Brasilía er eina landið sem sótt hefur um að halda keppnina, en Kólumbía hefur dregið sína beiðni til baka.

Smith í viðræðum við Newcastle

Framherjinn Alan Smith hjá Manchester City er talinn vera í viðræðum við Newcastle um að leikmaðurinn gangi til liðs við félagið. Smith er sagður hafa hafnað Middlesbrough, en Sunderland, Everton og West Ham eru sögð vera á eftir leikmanninum.

Aston Villa fær varnarmann frá Bandaríkjunum

Aston Villa hefur tryggt sér þjónustu bandaríska varnarmannsins Eric Lichaj. Lichaj er 18 ára gamall og spilaði með háskólanum í North Carolina. Leikmaðurinn heillaði Martin O´Neill, framkvæmdastjóra Aston Villa, upp úr skónum þegar hann lék með U17 og U20 ára liðum Bandaríkjanna, og skrifaði í framhaldi af því undir tveggja ára samning.

Bolton kaupir norskan kantmann frá Rosenborg

Norski kantmaðurinn Daniel Braaten hefur samþykkt að ganga til liðs við Heiðar Helguson og félaga í Bolton. Bolton borgar Rosenborg 425 þúsund pund fyrir þennan 25 ára leikmann. Nokkrir enskir og franskir klúbbar voru á eftir leikmanninum en Bolton sigraði kapphlaupið.

Juventus neitar tilboði City í Chiellini

Manchester City hefur mistekist að landa ítalska U21 landsliðsmanninnum Giorgio Chiellini frá Juventus. Giovanni Cobolli Gigli, forseti Juventus staðfestir að Juventus hafi hafnað tilboði City. Leikmaðurinn hefur ekki farið leynt með þrá sína fyrir að spila á Englandi en Gigli segir að hann verði ekki seldur.

Deco vill vinna aftur með Mourinho

Miðjumaðurinn Deco hjá Barcelona hefur gefið það út að hann myndi langa að vinna með José Mourinho, framkvæmdastjóra Chelsea. Deco var einn af lykilmönnum Porto þegar liðið varð Evrópumeistari undir stjórn Mourinho. Orðrómur hefur verið á kreiki að Barcelona vilji losna við leikmanninn vegna komu Thierry Henry í liðið.

Atletico Madrid klófestir Reyes

Atletico Madrid hefur staðfest að þeir hafi nælt sér í Jose Antonio Reyes frá Arsenal. Spænski framherjinn hefur ekki farið leynt með að hann vilji spila í heimalandinu eftir vonbrigði á Englandi með Arsenal, en hann var á láni hjá Real Madrid á síðasta tímabili. Á vefsíðu Skysports kemur fram að Reyes muni skrifa undir fjögurra ára samning við félagið og kaupverðið er talið vera um 8,1 milljón punda.

Margrét Lára með sex mörk gegn ÍR

Valur valtaði yfir ÍR í kvöld í Landsbankadeild kvenna, 10-0. Margrét Lára Viðarsdóttir skoraði sex marka Vals, þar af tvö úr vítaspyrnum. Guðný Björk Óðinsdóttir skoraði tvö og þær Vanja Stefanovic og Dóra María Lárusdóttir sitt markið hvor.

Stefán með tvö í sigri á Ljungskile

Stefán Þórðarson skoraði bæði mörk Norrkoping í 2-0 sigri gegn Ljungskile í næstefstu deild í Svíþjóð. Stefán skoraði bæði mörkin í fyrri hálfleik. Stefán var ásamt Garðari Gunnlaugssyni í byrjunarliðinu en Garðar var tekinn út af í fyrri hálfleik. Norrkoping er sem fyrr í efsta sæti deildarinnar með 41 stig eftir 16 leiki, 12 siga forskot á GIF Sundsvall sem er í öðru sæti.

Pele vill að Beckham einbeiti sér að knattspyrnunni

Knattspyrnugoðsögnin Pele ítrekar það við David Beckham að hann eigi að hætta að lifa þessu glamúrlífi og einbeita sér að knattspyrnunni. Beckham hefur verið mikið í sviðsljósinu upp á síðkastið eftir að hann samþykkti að ganga til liðs við LA Galaxy.

U17: Strákarnir töpuðu gegn Englendingum

Ísland tapaði í dag í fyrsta leik sínum á Norðurlandamóti U17 karla fyrir Englendingum. Leikurinn fór 2-0 og skoruðu Englendingar bæði mörk sín í seinni hálfleik með stuttu millibili. Strákarnir mæta Svíum á morgun klukkan 13:00. Mótið fer fram í Danmörku.

Teitur rekinn frá KR

Teitur Þórðarson hefur verið rekinn frá KR og Logi Ólafsson fyrrverandi landsliðsþjálfari tekur við liðinu og stjórnar sinni fyrstu æfingu klukkan 18:30. KR-ingar eru í neðsta sæti Landsbankadeildarinnar, aðeins með 7 stig eftir 11 umferðir. Teitur skrifaði upphaflega undir fimm ára samning við KR-Sport.

Arnór: Eiður er opinn fyrir að ganga til liðs við West Ham

Arnór Guðjohnsen, faðir og umboðsmaður Eiðs Smára Guðjohnsen, segir að sonur sinn væri áhugasamur um að ganga til liðs við West Ham. Eiður hefur verið sterklega orðaður við West Ham í sumar. Eftir að Barcelona keypti Thierry Henry fyrr í sumar er ljóst að Eiður hefur færst aftar í goggunarröðina.

Furyk fór holu í höggi og sigraði í Kanada annað árið í röð

Bandaríkjamaðurinn Jim Furyk varði titil sinn í Kanada um helgina. Hann fór holu í höggi á fjórðu holunni og komst þá í forystu sem hann lét ekki af hendi. Hann spilaði á 64 höggum á síðasta hring og endaði mótið 16 höggum undir pari og var einu höggi á undan Vijay Singh. Fyrir 13. sigur sinn á mótaröðinni fékk hann 900.000 dollara.

Fabregas aðaltakmark Real Madrid fyrir næsta tímabil?

Aðaltakmark Real Madrid á næsta tímabili gæti orðið að klófesta Cesc Fabregas frá Arsenal. Real Madrid hefur oft lýst yfir áhuga sínum á miðjumanninum. Ramon Calderon, forseti félagsins, lofaði stuðningsmönnum Madrid að hann myndi fá Fabregas, Kaká og Arjen Robben til liðsins þegar hann bauð sig fram til forseta, en hann hefur ekki staðið við það hingað til.

Ghaly skrifar undir hjá Birmingham

Egypski miðjumaðurinn Hossam Ghaly hefur skrifað undir þriggja ára samning við Birmingham. Birmingham borgar Tottenham 3 milljónir punda fyrir þennan 25 ára gamla leikmann. Steve Bruce, framkvæmdastjóri Birmingham, hefur nú keypt átta leikmenn til liðsins í sumar, en Birmingham komst upp úr næstefstu deild á Englandi á síðasta tímabili.

Nicola Zigic vinsæll í Evrópu

Nicola Zigic, serbneski framherjinn hjá Racing Santander, er vinsæll á meðal liða víðs vegar um Evrópu. Fenerbache og Manchester City höfðu bæði lýst yfir áhuga sínum á kappanum og nú hefur Werder Bremen bæst í hópinn.

Landsbankadeild kvenna: Toppliðin sigruðu örugglega

Fjórir leikir voru leiknir í Landsbankadeild kvenna í kvöld. KR og Valur sitja enn á toppi deildarinnar eftir stóra sigra á andstæðingum sínum. Hins vegar sitja Fylkir og Þór/KA enn á botni deildarinar eftir að hafa tapað sínum leikjum.

Björgvin á 3 högg á Örn Ævar þegar mótið er hálfnað

Björgvin Sigurbergsson úr GK hefur þriggja högga forystu í karlaflokki þegar Íslandsmótið á Hvaleyrinni er hálfnað. Hann lék hringinn í dag á 70 höggum, eða einu höggi undir pari og er samtals á 138 höggum, eða 4 höggum undir pari.

Skagamenn hafa innbyrgt 13 stig af síðustu 15 mögulegum

Skagamenn hafa innbyrgt 13 stig af síðustu 15 mögulegum í Landsbankadeild karla í knattspyrnu. ÍA vann öruggan sigur á HK þegar liðin áttust við í 11. umferð deildarinnar í gær. Skagamenn eru nú í þriðja sæti deildarinnar með jafnmörg stig og Keflavík.

Southgate ætlar sér að fá Smith

Gareth Southgate, framkvæmdastjóri Middlesbrough, ætlar að gera tilraun til að klófesta framherjann Alan Smith þegar hann kemur heim úr æfingaferð Manchester United í Asíu. Sir Alex Ferguson hefur gefið sterklega í skyn að leikmaðurinn muni yfirgefa United í sumar og það gefur Southgate von.

Fjórir leikir í Landsbankadeild kvenna í kvöld

Fjórir leikir fara fram í Landsbankadeild kvenna í kvöld. Fylkir fær Breiðablik í heimsókn, KR tekur á móti Keflavík, Stjarnan tekur á móti ÍR og Valur mætir Þór/KA á Akureyri. Valur og KR eru á toppi deildarinnar með 19 stig eftir 7 leiki, en Þór/KA og Fylkir eru á botninum með 3 stig eftir 7 leiki. Leikirnir hefjast klukkan 19:15.

Henry segir Ljungberg hafa rétt á að gera það sem hann vill

Thierry Henry segir að fyrrverandi félagi sinn hjá Arsenal, Freddie Ljungberg, sé fullorðinn maður og hafi rétt á hafa sínar skoðanir. Ljungberg yfirgaf Arsenal fyrir skömmu til að ganga til liðs við West Ham og segist efast um metnað Arsenal. Ljungberg sagði einnig að brottför Henry til Barcelona hafi opnað augu sín og þá hafi hann ákveðið að yfirgefa klúbbinn.

Martins: Ég er ekki að fara neitt

Framherjinn Obafemi Martins segist vera mjög ánægður hjá Newcastle og að hann sé ekki á leiðinni frá félaginu. Arsenal hefur mikinn áhuga á Martins og Arsene Wenger hefur greint frá því að hann hafi mikið álit á leikmanninum, en Martins skoraði 17 mörk á sínu fyrsta tímabili fyrir Newcastle.

Íslenska liðið tapaði fyrir Tékkum í leik um 7. sætið

Íslenska U17 ára landslið kvenna í handknattleik endaði í 8. sæti á Ólympíuhátíð æskunnar í Belgrad eftir naumt tap gegn Tékkum í leik um 7. sætið. Leikurinn endaði 32-30 fyrir Tékkum en íslenska liðið hafði yfirhöndina þegar skammt var eftir af leiknum.

Nýju mennirnir klikkuðu hjá Liverpool

Portsmouth vann Asíubikarinn í dag þegar liðið hafði betur gegn Liverpool eftir vítaspyrnukeppni í úrsitaleiknum. Staðan var markalaus eftir venjulegan leiktíma og þá var farið beint í vítaspyrnukeppni. Fernando Torres og Yossi Benayoun misnotuðu báðir sínar spyrnur. Hermann Hreiðarsson tók víti fyrir Portsmouth og nýtti það. Portsmouth vann 4-2.

Rijkaard segir það ekki vera vandamál að stilla stjörnunum í byrjunarliðið

Frank Rijkaard segir að að það verði ekkert mál að stilla stjörnunum fjórum upp saman í byrjunarliði Barcelona. Þar á hann við Samuel Eto´o, Lionel Messi, Ronaldinho og Thierry Henry, en mikið hefur verið rætt um að þeir gætu ekki allir verið í byrjunarliðinu.

Heinze ákveðinn í að komast frá United

Argentíski landsliðsmaðurinn Gabriel Heinze hefur nú tekið til þeirra ráða að ráða lögfræðifyrirtæki til starfa til að auðvelda honum að komast frá Manchester United til erkifjandanna í Liverpool.

Henry skoraði í fyrsta leiknum fyrir Barcelona

Thierry Henry skoraði eina mark Barcelona í sigri gegn Dundee United í Skotlandi í kvöld. Markið kom á 89. mínútu eftir vítaspyrnu. Henry tók spyrnuna sem var varin en hann fylgdi vel á eftir. Þetta var fyrsti leikurinn sem Henry spilar fyrir Barcelona en hann kom frá Arsenal í sumar.

Skagamenn sigruðu HK á Akranesi

Skagamenn sigruðu í kvöld HK á heimavell í landsbankadeild karla, 4-1. Þórður Guðjónsson skoraði tvö mörk fyrir ÍA og þeir Andri Júlíusson og Vjekoslav Svadumovic sitt markið hvor. Finnur Ólafsson skoraði fyrir HK. Með sigrinum er ÍA komið í 4. sæti með 18 stig eins og Keflavík, en lakara markahlutfall. HK er áfram í 8. sæti með 11 stig.

Newcastle sigraði Celtic í vináttuleik

Newcastle sigraði í kvöld Celtic í vináttuleik, 4-1. Albert Luque skoraði tvö mörk fyrir Newcastle, Obafemi Martins eitt og James Milner eitt. Scott Brown skoraði fyrir Celtic. Varamarkvörður Newcastle, Steve Harper, spilaði síðustu 11 mínúturnar sem framherji vegna þess að Nicky Butt meiddist og Newcastle voru búnir með útileikmenn sína.

Anna Jódís og Valdís efstar í kvennaflokki

Anna Jódís Sigurbergsdóttir úr GK og Valdís Þóra Jónsdóttir úr GL deila efsta sæti eftir fyrsta hring í kvennaflokki á Íslandsmótinu á Hvaleyrinni. Þær léku báðar hringinn í dag á 75 höggum, eða 4 höggum yfir pari.

Þrír deila efsta sæti í karlaflokki

Þeir sem voru ræstir út eftir hádegi í karlaflokki á fyrsta hring á Íslandsmótinu á Hvaleyrinni hafa ekki verið að ógna skori þeirra bestu sem kláruðu hringinn fyrr í dag. Ástæðan fyrir því er að hluta til sú að nokkur vindur hefur verið á vellinum eftir hádegi, en þeir sem fóru út í morgun fengu logn eða hæga norðan golu.

Ferguson reiðubúinn að bíða í ár eftir Tevez

Sir Alex Ferguson, framkvæmdastjóri Manchester United, segist vera tilbúinn að bíða í allt að ár eftir að fá Argentínumanninn Carlos Tevez frá West Ham. United þarf að klára kaupin á Tevez fyrir 31. ágúst ef þeir ætla að nota hann fyrir áramót, en kaupin stranda á Kia Joorabchian, umboðsmanni Tevez.

Einn leikur í Landsbankadeild karla í kvöld

Einn leikur verður í Landsbankadeild karla í kvöld. Skagamenn taka á móti HK-ingum á Akranesi. Sigri skagamenn leikinn komast þeir upp að hlið Keflavíkur í bili með 18 stig í þriðja sæti en með lélegra markahlutfall. HK getur með sigri komið sér upp fyrir Víking og í sjöunda sæti. Leikurinn hefst klukkan 19:15.

Moore með þrennu fyrir Aston Villa

Aston Villa spilaði sinn fyrsta leik á undirbúningstímabilinu í gær gegn Toronto FC. Villa sigraði leikinn 4-2. Luke Moore skoraði þrennu fyrir Villa og John Carew eitt. Martin O´Neill, framkvæmdastjóri Aston Villa segir að Moore gæti orðið goðsögn hjá félaginu, en hann hann var meiddur stóran hluta síðasta tímabils eftir að hafa byrjað mjög vel.

Partizan dæmt úr leik í Evrópukeppni félagsliða

Knattspyrnusamband Evrópu hefur vísað serbneska knattspyrnuliðinu Partizan úr Evrópukeppni félagsliða vegna óláta sem urðu á meðal áhorfenda í fyrsta leik liðsins í keppninni gegn NK Zrinjski frá Bosníu. Liðið þarf að auki að borga tvær og hálfa milljón króna í sekt. Partizan, sem sigraði leikinn 6-1, hefur þrjá daga til að áfrýja ákvörðun sambandsins.

Verður Gallas næsti fyrirliði Arsenal?

Arsene Wenger, framkvæmdastjóri Arsenal, segir að honum liggi ekkert á að velja nýjan fyrirliða. En talið er að William Gallas sé efstur á lista hjá Wenger þar sem Gallas bar fyrirliðabandið í vináttuleik gegn Salzburg í gær. Eins og margir vita þá bar Thierry Henry fyrirliðabandið fyrir Arsenal en hann er nú fluttur til Spánar.

Petrov valdi City frekar en Tottenham

Búlgarski vængmaðurinn Martin Petrov hefur samþykkt að ganga til liðs við Manchester City frá Atletico Madrid. City borgar 4,7 milljónir punda fyrir leikmanninn. Leikmaðurinn skrifaði undir þriggja ára samning við félagið. Talið var líklegast að hann væri á leið til Tottenham, en hann segist hafa valið City vegna Sven Göran Eriksson.