Segist vilja fara til Real Madrid

Spænska dagblaðið Marca birtir í dag viðtal við portúgalska vængmanninn Cristiano Ronaldo hjá Manchester United, þar sem haft er eftir honum að hann vilji ganga í raðir Real Madrid. Ronaldo segist vilja hefja viðræður um að fara til Spánar ef Juan Miguel Villar vinnur forsetakosningarnar hjá Real Madrid sem verða innan skamms.

Gary Neville leikfær gegn Portúgal

Hægri bakvörðurinn og enski landsliðsmaðurinn, Gary Neville, hefur verið frá undanfarnar tvær vikur vegna meiðsla í kálfa. Steve McLaren, aðstoðarþjálfari enska landsliðsins, sagði við fréttamenn í dag að Neville væri á góðum batavegi og myndi æfa með liðinu á morgun.

Nýr Hollendingur tekur við Suður-Kóreu

Landslið Suður-Kóreu hefur ráðið fyrrum aðstoðarþjálfara sinn Pim Verbeek, sem næsta landsliðsþjálfara til næstu 2 ára.

Fagurfræði eða eyðileggingarfótbolti

Síðustu leikirnir í sextán liða úrslitum í dag, allir vilja Brasilíumenn áfram, og svo skiptist heimurinn í tvo hluta þegar kemur að Frökkum og Spánverjum, nú skiptir fagurfræðin ekki lengur máli, heldur árangur.

Markaregn í kvöld

Þrír leikir fóru fram í Landsbankadeild kvenna í knattspyrnu í kvöld og ekki vantaði mörkin frekar en fyrri daginn. Valur valtaði yfir FH á útivelli 15-0, KR sigraði Fylki 11-0 og Keflavík sigraði Þór/KA 6-3.

Úkraína áfram eftir vítakeppni

Úkraínumenn mæta Ítölum í 8-liða úrslitunum á HM eftir sigur á Svisslendingum í vítakeppni í kvöld. Staðan að loknum venjulegum leiktíma og framlengingu var 0-0 og greinilegt að bæði lið sættu sig fyllilega við að fara í sína fyrstu vítaspyrnukeppni á HM. Það voru Úkraínumennirnir sem reyndust hafa betri taugar en Svisslendingarnir, því þeir skoruðu úr þremur af fjórum spyrnum sínum, en svissneska liðið skoraði ekki úr einni einustu.

Kewell gat ekki leikið vegna gigtar

Talsmenn ástralska landsliðsins hafa gefið það út að miðjumaðurinn Harry Kewell hafi ekki geta spilað með liðinu í dag því hann þjáist af gigt. Talið var að það hefðu verið nárameiðsli sem voru að stríða leikmanninum, en nú hefur verið staðfest að hann var mjög kvalinn vegna ákveðnar tegundar gigtar.

Framlengt í Köln

Leikur Úkraínu og Sviss er farinn í framlengingu eftir að hvorugu liðinu tókst að skora í venjulegum leiktíma. Lítið fór fyrir sóknartilburðum í síðari hálfleiknum, þó helst væru það Úkraínumennirnir sem þorðu að taka smá áhættu og sækja á fleiri mönnum. Ef svo fer sem horfir, er leikurinn ekki á leið neitt annað en í vítakeppni.

Rándýr rigning á Wimbledon

Keppnishaldarar á Wimbledon mótinu þurfa að punga út yfir einni milljón punda til að endurgreiða miðasölu eftir fyrsta keppnisdaginn, en stanslaust regn hefur orðið til þess að lítið sem ekkert hefur verið spilað þar í dag. Reglur segja til um að ef ekki næst að spila í klukkutíma eða meira, verði að endurgreiða aðgangseyrir. Mótshaldarar sögðu upp tryggingum fyrir slíku fyrir tveimur árum og þurfa því að borga brúsann úr eigin vasa.

Jafnt hjá Úkraínu og Sviss í hálfleik

Ekkert mark hefur verið skoraði í leik Úkraínu og Sviss í 16-liða úrslitunum á HM þegar flautað hefur verið til hálfleiks. Bæði lið hafa átt skot í þverslá í fyrri hálfleiknum en inn vildi boltinn ekki.

Nýtur þess ekki að spila á HM

Ashley Cole, bakvörður enska landsliðsins og Arsenal, hefur verið einhver besti maður liðsins í keppninni. Hann segist þó alls ekki njóta þess að spila á HM vegna þeirra gríðarlegu pressu sem sé á liðinu í fjölmiðlum.

Kæru dómarar, ekki meir

Mér leiðist að væla í dómaranum, en ég hreinlega verð, eftir að hafa horft uppá 16 gul spjöld í gær, fjögur rauð í leik Portúgala og Hollendinga, fer þetta að vera gott, ekki það að sum þeirra hafi verið verðskulduð, sannarlega, en svona mörg er bara vitleysa.

Sviss - Úkraína að hefjast

Sergei Rebrov hefur verið settur út úr byrjunarliði Úkraínu fyrir leikinn gegn Sviss og Andriy Vorobey kemur inn í hans stað. Þá hafa Svisslendingar skipt um Arsenal-menn í vörninni hjá sér, þar sem Johan Djourou kemur inn í stað hins meidda Philippe Senderos. Leikurinn fer fram í Cologne.

Ég hafði aldrei áhyggjur

Marcello Lippi var stóískur eftir sigurinn á Áströlum í dag og sagðist aldrei hafa óttast að hans menn myndu tapa leiknum þrátt fyrir að vera manni færri frá því í upphafi síðari hálfleiks.

Vítaspyrnudómurinn var loðinn

Guus Hiddink var að vonum vonsvikinn eftir að hans menn Ástralar féllu úr keppni á HM eftir 1-0 tap fyrir Ítölum. Hiddink þótti vítaspyrnudómurinn í blálokinn nokkuð loðinn, en viðurkenndi að hans menn gætu sjálfum sér um kennt að hafa ekki náð að skora fyrr, þar sem þeir voru manni fleiri hálfan leikinn.

John Hartson til West Brom

Enska 1. deildarliðið West Brom gekk í dag frá kaupum á framherjanum John Hartson frá skosku meisturunum Glasgow Celtic. Kaupverðið hefur ekki verið gefið upp, en hann hefur undirritað tveggja ára samning við félagið og verður ætlað að hjálpa Bryan Robson og hans mönnum að komast beint aftur upp í úrvalsdeildina eftir fall í vor.

Glen Johnson á leið til Feyenoord?

Forráðamenn hollenska liðsins Feyenoord fullyrða að varnarmaðurinn Glen Johnson sé við það að ganga í raðir félagsins á lánssamningi. Johnson var á sínum tíma fyrsti leikmaðurinn sem keyptur var til Englandsmeistara Chelsea eftir að Roman Abramovich tók við á sínum tíma, en hefur ekki hlotið náð fyrir augum Jose Mourinho. Johnson á að baki fimm landsleiki fyrir England.

Ótrúleg dramatík í Kaiserslautern

Ítalar eru komnir í 8-liða úrslitin á HM eftir dramatískan sigur á Áströlum í Kaiserslautern í dag. Ítalar voru manni færi síðustu 40 mínúturnar eftir að Marco Materazzi var vikið af leikvelli í upphafi síðari hálfleiks, en fengu vítaspyrnu á síðasta andartaki uppbótartíma og úr henni skoraði varamaðurinn Francesco Totti. Vítaspyrnudómurinn var nokkuð vafasamur, en bakvörðurinn Fabio Grosso lék á tvo varnarmenn Ástrala og lét sig falla í vítateignum.

Ég þarf bara eitt mark

Wayne Rooney segir að sjálfstraust hans sé að aukast með hverjum leiknum sem hann spilar fyrir enska landsliðið og segir að það eina sem hann vanti til að ná fullum styrk á ný sé að skora mark á HM.

Jafnt í hálfleik hjá Ítölum og Áströlum

Enn hefur ekki verið skorað mark í leik Ástrala og Ítala í 16-liða úrslitunum á HM. Ítalska liðið hefur átt fleiri færi í leiknum, en enn sem komið er hefur framherjum liðsins ekki tekist að skora hjá baráttuglöðum Áströlunum.

Keppni frestað vegna rigninga

Hið sögufræga Wimbledon-mót í tennis fer ekki vel af stað í ár, en þátttakendur hafa lítið sem ekkert geta spilað í dag vegna rigninga. Roger Federer náði til að mynda aðeins að spila eitt sett áður en leik hans var frestað og veðurspá morgundagsins ku ekki vera mikið glæsilegri.

Á leið til sérfræðings í Bandaríkjunum

Enski landsliðsmaðurinn Michael Owen fer á næstu dögum til Bandaríkjanna ásamt læknum Newcastle, þar sem hann mun gangast undir læknismeðferð hjá hinum virta lækni Richard Steadman. Sá átti stóran þátt í að lappa upp á Alan Shearer þegar hann meiddist á hné á sínum tíma og vonast menn til að Owen nái sér sem fyrst í kjölfarið.

Robinho verður ekki með gegn Gana

Robinho verður ekki með Brasilíumönnum þegar þeir mæta Gana í 16-liða úrslitunum á HM á morgun, en hann er lítillega tognaður á læri. Búist er við að Adriano komi aftur inn í framlínu Brassa í stað hans, en Adriano hvar hvíldur í leiknum gegn Japan í riðlakeppninni. Ganamennirnir verða án miðjumannsins sterka Michael Essien á morgun, en hann tekur út leikbann.

Bjartsýnir á að Ronaldo verði með gegn Englendingum

Forráðamenn portúgalska landsliðsins eru bjartsýnir á að vængmaðurinn Cristiano Ronaldo verði búinn að ná sér af meiðslum sínum þegar liðið mætir Englendingum í 8-liða úrslitunum á HM á laugardaginn. Ronaldo fékk ljótt spark í lærið gegn Hollendingum í gær og er mjög marinn, en er væntanlegur til æfinga á ný á miðvikudaginn.

Figo sleppur með skrekkinn

Luis Figo sleppur við að taka út leikbann þegar Portúgalar mæta Englendingum í 8-liða úrslitunum á HM, þó myndir frá leik Portúgal og Hollands í gær hafi greinilega sýnt að hann skallaði Mark Van Bommel.

Mark Beckhams 124 milljón punda virði

Markið sem að David Beckham skoraði í leiknum á móti Ekvador í 16 liða úrslitunum á HM er talið vera gífurlega mikilvægt fyrir breskan efnahag. Sérfræðingar telja að markið muni bæta efnahaginn um 124 milljónir punda á næstu vikum.

Neville verður klár

Steve McClaren fullyrðir að bakvörðurinn Gary Neville verði klár í slaginn gegn Portúgölum í 8-liða úrslitum HM. Neville tók þátt í léttum æfingum í dag og á að vera með af fullum krafti á morgun og miðvikudag. Hann hefur verið meiddur á kálfa og óttast var að hann gæti ekki leikið meira í mótinu.

Leikur Ítala og Ástrala að hefjast

Leikur Ítala og Ástrala í 16-liða úrslitunum á HM hefst klukkan 15:00 og búið er að tilkynna byrjunarliðin. Harry Kewell mætti til leiks á hækjum og verður því ekki í liði Ástrala í dag og Alessandro del Piero er kominn í byrjunarlið Ítala í stað Francesco Totti.

Van Basten æfur út í dómarana

Þjálfari Hollenska landsliðsins, Marco van Basten, var mjög gagnrýnin á rússneska dómarann Valentin Ivanov eftir að lið hans datt út úr keppninni eftir tapleik gegn Portúgal í gær.

Ballack missir af æfingu þýska liðsins

Fyrirliði þýska landsliðsins Michael Ballack meiddist lítillega í sigurleiknum gegn Svíum og gat því ekki æft með landsliðinu í dag. Aðstoðarþjálfari Þýska landsliðsins, Oliver Bierhoff, sagði að þetta væru ekki alvarleg meiðsli og líklega yrði hann með í leiknum gegn Argentínu í 8-liða úrslitum á föstudaginn.

Portúgalar áfram í ljótum leik

Það verða Portúgalar sem mæta Englendingum í 8-liða úrslitunum á HM eftir að liðið lagði Hollendinga 1-0 í dag. Það var Maniche sem skoraði sigurmarkið í fyrri hálfleik, en leikurinn leystist upp í algjöra vitleysu í þeim síðari og alls voru fjórir leikmenn reknir af velli með rautt spjald.

Kahn er enn bitur yfir að missa sæti sitt

Þýski markvörðurinn Oliver Kahn fer ekki leynt með óánægju sína út í landsliðsþjálfarann Jurgen Klinsmann fyrir að taka sig úr byrjunarliði Þjóðverja. Jens Lehmann fékk byrjunarliðssætið skömmu fyrir keppnina og hefur það ekki orðið til að bæta vinskapinn milli markvarðanna tveggja, sem þó voru litlir félagar fyrir.

Portúgalar yfir í hálfleik

Portúgalar hafa yfir 1-0 gegn Hollendingum í leik liðanna í 16-liða úrslitunum á HM, en fyrri hálfleikurinn hefur verið viðburðaríkur. Maniche kom Portúgölum yfir eftir 23 mínútur og Cristiano Ronaldo fór meiddur af velli 10 mínútum síðar. Portúgalar urðu svo fyrir öðru áfalli rétt fyrir lok hálfleiksins þegar Costinha lét reka sig af velli með sitt annað gula spjald og eru Hollendingar því manni fleiri allan síðari hálfleikinn.

Ronaldo farinn meiddur af velli

Portúgalar hafa orðið fyrir áfalli í leiknum gegn Hollendingum, því vængmaðurinn knái Ronaldo frá Manchester United er farinn meiddur af leikvelli. Ronaldo fékk spark í lærið og haltraði af velli á 34. mínútu. Þessu ungi leikmaður var afar vonsvikinn að sjá þegar hann gekk af velli og táraðist á varamannabekknum þegar hlúð var að sárum hans.

Portúgalar komnir yfir

Portúgalar eru komnir í 1-0 gegn Hollendingum í 16-liða úrslitunum á HM. Það var Maniche sem skoraði mark portúgalska liðsins með laglegu skoti á 23.mínútu.

Ver leikaðferðir sínar

Sven-Göran Eriksson segist þess fullviss að 4-5-1 leikkerfið sem hann notaði í dag geti reynst enska liðinu vænlegt til árangurs í keppninni og var Eriksson gagnrýndur nokkuð þrátt fyrir sigurinn í dag, en enska liðið þótti spila leiðinlegan og hugmyndasnauðan sóknarleik.

Enn vinnur Alonso

Heimsmeistarinn Fernando Alonso sigraði í Kanadakappakstrinum sem fram fór í Montreal í dag, en þetta var fyrsti sigur hans í Norður-Ameríku á ferlinum. Alonso leiddi frá upphafi til enda og Michael Schumacher hafnaði í öðru sæti. Kimi Raikkönen varð þriðji og félagi Alonso, Giancarlo Fisichella, kom þar á eftir í fjórða sætinu. Þetta var fimmti sigur Spánverjans unga í röð og er heldur hann því góðu forskoti sínu í stigakeppni ökumanna.

Tíunda viðureign liðanna

Portúgal og Holland hafa mæst níu sinnum áður. Portúgalar hafa unnið fimm sinnum, Hollendingar aðeins einu sini og þrisvar sinnum hafa liðin skilið jöfn. Síðast þegar liðin mættust, í undanúrslitum Evróðumótsins 2004, sigruðu Portúgalar 2-1. Tíu af ellefu manna byrjunarliðinu þá eru í hópi Portúgala nú. Leikur Portúgala og Hollendinga hefst klukkan 19 og verður leikurinn í beinni á Sýn.

Berum höfuðið hátt

Þjálfari Ekvador var sáttur við frammistöðu sinna manna í tapinu fyrir Englendingum í 16-liða úrslitunum á HM í dag og sagðist hafa grunað að úrslitin réðust á einu atriði eins og raun bar vitni, en aðeins vel tekin aukaspyrna enska fyrirliðans skildi liðin að í dag.

Kuyt byrjar í stað Nistelrooy

Stórleikur Hollendinga og Portúgala í 16-liða úrslitum HM hefst klukkan 19 og er sýndur í beinni útsendingu á Sýn. Byrjunarliðin eru klár og mesta athygli vekur að Marco Van Basten, þjálfari hollenska liðsins, hefur staðið við það sem hann hótaði fyrir helgina með því að setja Ruud Van Nistelrooy á bekkinn. Dirk Kuyt er því í framlínunni hjá Hollendingum í dag.

Vona að ég hafi þaggað niður í gagnrýnendum

David Beckham, fyrirliði enska landsliðsins, viðurkenndi að frammistaða liðsins í dag hefði ekki verið sérlega sannfærandi, en þótti ágætt að ná að þagga aðeins niður í gagnrýnendum sínum með því að skora sigurmarkið.

Bara aleinn Beckham

,,It was ugly at times'' sagið David Beckham um leik Englendinga og Ekvadora í dag, hann gerði það eina rétta, skoraði frábært mark úr aukaspyrnu og Englendingar eru komnir áfram, sannarlega bjargvætturinn rétta eina ferðina til.

Tilþrifalítill sigur Englendinga

Englendingar tryggðu sér í dag sæti í 8-liða úrslitunum á HM þegar þeir lögðu lið Ekvador 1-0 í Stuttgart. David Beckham skoraði sigurmark enskra beint úr aukaspyrnu í síðari hálfleik, en þar með eru tilþrif liðsins upptalin. Englendingar mæta Hollendingum eða Portúgölum í næstu umferð.

Ég er orðinn leikmaður Tottenham

Miðjumaðurinn Didier Zokora frá Fílabeinsströndinni sagði breskum fjölmiðlum í dag að hann væri orðinn leikmaður Tottenham. Zokora er samningsbundinn franska liðinu St. Etienne, en fregnir herma að enska félagið sé að ganga frá kaupum á honum fyrir rúmar átta milljónir punda.

Beckham kemur Englendingum yfir

David Beckham hefur komið Englendingum yfir 1-0 gegn Ekvador. Markið kom eftir skot hans beint úr aukaspyrnu á 59. mínútu og er enskum eflaust mikið létt í kjölfarið. Enska liðið hefur alls ekki verið að spila vel í dag, en leikmenn liðsins hressast væntanlega eitthvað í kjölfar marksins.