Menntamálaráðuneytið snuprar Félag framhaldsskólakennara

Forysta Félags framhaldsskólakennara þarf að læra að fara rétt með staðreyndir. Einungis með því móti þjónar hún hagsmunum umbjóðenda sinna og skólasamfélagsins alls. Þetta kemur fram í yfirlýsingu sem menntamálaráðuneytið sendi frá sér fyrir stundu í tilefni ályktunar framhaldsskólakennara frá því í fyrradag.

Nýtum ekki refsiheimildir

Heimild í íslenskum lögum til að sækja fólk til saka fyrir kynferðisglæpi sem það fremur erlendis hefur aldrei verið nýtt. Nágrannalönd okkar hafa þó lagt áherslu á að taka hart á slíkum málum.

Flugvél hrapaði undan ströndum Kanada

Flugvél hrapaði í hafið út af austurströndum New Brunswick-héraðs í Kanada í dag. Fyrstu fréttir hermdu að vélin hafi verið fjögurra hreyfla Herkúles flutningavél en talsmenn kanadíska hersins segja hinsvegar að engrar slíkrar vélar sé saknað. Mögulegt er því að um minni vél hafi verið að ræða. Málið er í rannsókn.

Fræðsla um kynferðisofbeldi gegn börnum rædd á Alþingi

Fræðsla um kynferðisofbeldi gegn börnum í Kennaraháskóla Íslands er mjög ábótavant, sagði Ágúst Ólafur Ágústsson, þingmaður Samfylkingar, á Alþingi í dag. Menntamálaráðherra svaraði því til að nú þegar fái allir nemendur Kennaraháskólans víðtæka kennslu hvað þetta varðar, bæði í kjarna- og valnámskeiðum.

Ríkið borgar sveitarfélögunum

Tekjur sveitarfélaganna aukast um 200 milljónir króna þegar ríkið fer í fyrsta sinn að greiða fasteignagjöld af húsnæði í sinni eigu. Ríkisvaldið hefur hingað til ekki þurft að greiða sveitarfélögum fasteignagjöld af eignum sínum. Þetta breytist hins vegar um áramót vegna samkomulags sveitarfélaganna og ríkisins um tekjustofna sveitarfélaga.

Ríkisstjórnin með stefnu gegn landsbyggðinni?

Tillaga um að veita fé til Byggðastofnunar var felld á Alþingi fyrir stundu. Steingrímur J. Sigfússon, formaður Vinstri grænna, sagði það ótrúlegt að ríkisstjórnin ætli að ljúka þingstörfum fyrir jól án þess að bæta eiginfjár stöðu stofnunarinnar. Sigurjón Þórðarson, þingmaður Frjálslynda flokksins, gagnrýndi einnig ríkisstjórnina fyrir að aðstoða Byggðastofnun ekki til að rétta af fjárhaginn og sagði stjórnina reka stefnu gegn landsbyggðinni.

Launaskriðið er hjá stjórnendum

Launaskriðið er hjá stjórnendum fyrirtækja en ekki almennum launþegum segir borgarstjóri. Laun hundrað stjórnenda hækkuðu um hálfan milljarð króna í fyrra en samningur borgarinnar við fimm þúsund starfsmenn sína skilar þeim samanlagt einum og hálfum milljarði í launahækkun á næsta ári.

Réttarhöldunum yfir Saddam frestað í tvær vikur

Réttarhöldunum yfir Saddam Hussein, fyrrverandi forseta Íraks, var frestað í tvær vikur í dag eftir að Saddam neitaði að vera viðstaddur þau. Til stóð að halda réttarhöldunum áfram í dag og voru tvö vitni að grimmdarverkum Saddams kölluð í vitnastúku.

Ákærðir fyrir að fjármagna hryðjuverkastarfsemi

Tveir félagar í Danmerkurdeild palestínsku samtakanna al-Aqsa hafa verið ákærðir fyrir að fjármagna hryðjuverk. Greint er frá því á vef danska blaðsins Politiken að rannsókn yfirvalda hafi leitt í ljós að mennirnir hafi safnað peningum í Danmörku og sent þá til félaga sem tilheyri Hamas-samtökunum eða tengist þeim.

Landsmenn minntir á skiladag vegna jólakorta

Íslandspóstur vill minna landsmenn á að síðasti öruggi skiladagur til að póstleggja jólakortin til landa utan Evrópu er fimmtudagurinn 8. desember. Til að vera viss um að jólakortin til Evrópu skili sér fyrir jól er best að senda þau fimmtudaginn 15. desember eða fyrr. Síðasti öruggi skiladagur á jólakortum innanlands er miðvikudagurinn 21. desember.

Sjö létust í tjaldbruna á hamfarasvæðum í Pakistan

Sjö létust, þar af fjögur börn, þegar eldur kviknaði í tjaldi á hamfarasvæðunum í norðurhluta Pakistans í gærkvöld. Samkvæmt fréttum AP kviknaði í tjaldinu úr frá kerti og létust fjórir á staðnum en þrír á sjúkrahúsi skömmu síðar.

Mynt með mynd Benedikts XVI

Benedikt sextándi páfi fetaði í fótspor forvera síns, Jóhannesar Páls páfa annars, þegar myntslátta Páfagarðs gaf út evrumyntir með mynd Benedikts sextánda á framhliðinni.

Barónessa heiðursgestur á tónleikum

Frú Valerie Amos barónessa, talsmaður bresku ríkisstjórnarinnar í Lávarðadeildinni verður heiðursgestur Ólafs Ragnars Grímssonar forseta á hátíðartónleikum Sinfóníuhljómsveitar Íslands annað kvöld.

Kæra CIA fyrir að nema Þjóðverja á brott

Bandarísk mannréttindasamtök hafa kært CIA, leyniþjónustu Bandaríkjanna, fyrir hönd Þjóðverja sem var tekinn höndum og haldið í leynilegu fangelsi í Afganistan í hálft ár.

Saddam neitaði að vera við réttarhöld

Saddam Hussein, fyrrverandi forseti Íraks, neitaði að vera viðstaddur réttarhöldin yfir honum í Bagdad í dag og mætti ekki.

Sjálfstæðismenn á Ísafirði halda prófkjör í febrúar

Sjálfstæðisfélögin í Ísafjarðarbæ hafa ákveðið að halda prófkjör vegna sveitarstjórnarkosninga á komandi vori 11. febrúar. Þetta kemur fram á vef héraðsfréttablaðsins Bæjarins besta. Búið er að semja reglur vegna prófkjörsins, en framboðsfrestur rennur út 21. janúar.

Met í kaupum á erlendum verðbréfum

Hrein kaup íslenskra fyrirtækja og lífeyrissjóða á erlendum verðbréfum hafa aldrei verið meiri en í október síðastliðnum. Þá námu kaupin tæpum tuttugu og átta milljörðum króna að því er fram kemur í Morgunkornum Greiningardeildar Íslandsbanka.

Vilja úttekt á símanotkun Ísafjarðarbæjar

Atvinnumálanefnd Ísafjarðarbæjar hefur lagt til að gerð verði úttekt á símanotkun sveitarfélagsins og að á grundvelli hennar verði kannað verð og tilhögun á símaþjónustu með það að leiðarljósi að lækka kostnað sveitarfélagsins. Þetta kemur fram á fréttavef Bæjarins besta á Ísafirði.

Rottugangur í safnkössum sem ekki eru með vottun frá Svaninum

Rottugang í safnkössum má rekja til þess að fólk kaupir kassa sem ekki eru vottaðir af Norræna umhverfismerkinu Svaninum, segir Stefán Gíslason, verkefnisstjóri Staðardagskrár 21 á Íslandi. Safnkassar með vottun frá Svaninum eilítið dýrari en aðrir og velja því margir ódýrari kostinn. Það getur þó reynst dýrkeypt því slíkir kassar eiga það til gliðna og hleypa inn músum og rottum. Samþykktir kassar eru á hinn bóginn einangraðir og hafa engar rifur sem eru breiðari en 7 millimetrar.

Segir Mjólkursamsöluna hafa hlunnfarið sig

Bóndi hefur stefnt Mjólkursamsölunni fyrir að hafa hlunnfarið sig við uppgjör á stofnfjársjóði Samsölunnar. Sams konar mál varða um 500 aðra bændur sem samanlagt ættu tugmilljóna króna kröfu á Samsöluna ef dómstólar fallast á kröfu bóndans.

Heimabankaþjófur aðeins milliliður

Maður á þrítugsaldri hefur verið úrskurðaður í gæsluvarðhald vegna gruns um þjófnað úr heimabanka. Hann mun þó aðeins vera milligöngumaður. Bankar og sparisjóðir hvetja fólk til þess að vera á varðbergi gagnvart þjófnaði sem þessum.

Þúsundir flýja yfirvofandi eldgos

Þúsundir íbúa á eynni Vanuatu, í Suður-Kyrrahafi, hafa verið fluttir frá heimilum sínum vegna yfirvofandi eldgoss. Óttast er að flytja þurfi alla íbúa eyjarinnar á brott.

Öll undir sama þak

1.100 fermetra viðbygging við Breiðagerðisskóla í Reykjavík var formlega tekin í notkun í morgun. Með tilkomu nýju viðbyggingarinnar gerist það í fyrsta sinn í allmörg ár að nemendur Breiðagerðisskóla eru allir í sama húsnæði. Undanfarin ár hefur verið kennt í flytjanlegu húsnæði á lóð skólans og í gömlu leikskólahúsnæði.

Samningar BÍ og SA samþykktir í gær

Nýir kjarasamningar Blaðamannafélags Íslands við Samtök atvinnulífsins vegna Árvakurs og 365 miðla, voru samþykktir í almennri atkvæðagreiðslu í gær. Fylgjandi samningunum voru rúm 73 prósent en andvíg rúm 24 prósent.

26 þúsund velja fyrirtæki ársins

Um 26 þúsund manns taka þátt í viðamestu vinnumarkaðskönnun sem framkvæmd hefur verið hér á landi þegar Verzlunarmannafélag Reykjavíkur og SFR, stéttarfélag í almannaþjónustu, sameinast um könnun á ánægju, starfsskilyrðum og líðan fólks á vinnustað í byrjun næsta árs.

Dæmdur í 11 ára fangelsi fyrir kynferðisglæpi gegn fjölda barna

Finnskur maður á fimmtugsaldri var dæmdur í 11 ára fangelsi fyrir yfir 160 kynferðisglæpi gegn börnum. Dómurinn þykir sérlega þungur en maðurinn, Juoko Petri Jaatinen, framdi fleiri tugi glæpa gegn fjöldamörgum börnum á 10 ára tímabili. Kynferðisglæpirnir, sem flestir voru framdir á taílenskum vændisbörnum, þóttu sérlega grófir og niðurlægjandi í mörgum tilfellum og voru 6 fórnarlamba hans yngri en 10 ára. Samkvæmt finnskum lögum má sækja fólk til saka fyrir barnaníð þótt það hafi framið glæpinn í öðru ríki.

Þeim seku verður refsað

Kínversk stjórnvöld hafa heitið því að refsa þeim sem bera ábyrgð á sprengingu í efnaverksmiðju á dögunum sem varð til þess að hundrað tonn af eiturefnum láku í Songhua-ána og spilltu drykkjarvatni milljóna manna.

Mesta veðurhamfaraár sögunnar

Árið 2005 er mesta veðurhamfaraár sem skráð hefur verið samkvæmt skýrslu sem lögð var fram á loftslagsráðstefnu Sameinuðu þjóðanna í Montreal í Kanada.

Banna pyntingar innan og utan Bandaríkjanna

Bandarísk stjórnvöld hafa bannað öllum bandarískum erindrekum að beita fanga sína grimmd við yfirheyrslur, sagði Condoleezza Rice, utanríkisráðherra Bandaríkjanna í Úkraínu þar sem hún er í opinberri heimsókn.

Sýknaður af hryðjuverkaákærum

Bandarískur prófessor, Sami al-Arian, sem talað hefur fyrir réttindum Palestínumanna var sýknaður af hryðjuverkaákærum í Flórída í gær. Þetta er talinn mikill ósigur fyrir löggæsluna en bæði al-Arian og þrír aðrir sem tengdust málinu voru úrskurðaðir saklausir. Verjendur Arian segja málið vera fyrst og fremst pólitískt.

Stríðsglæpir fortíðar skulu ekki hafa áhrif á framtíðina

Japan á að hugsa um þann sársauka sem það hefur valdið Kína og Suður-Kóreu á árum áður en sagan á þó ekki að hindra framtíðarsamstarf, segir japanski utanríkisráðherrann Taro Aso. Samband Japan við Kína og Suður-Kóreu hefur beðið skaða að undanförnu vegna árlegra pílagrímsferða forsætisráðherrans, Junichiro Koizumi, til Yasukuni hofsins í Tókíó sem er tákn liðinna herátaka.

Allir velkomnir til Karmelsystra

Það eru margir sem heimsækja Karmelsystur í Hafnarfirði fyrir jólin enda taka þær öllum opnum örmum. Í lítilli verslun í klaustrinu gætir ýmissa grasa.

Hafnar ásökunum um staðreyndavillur

Skýrsla Stjórnhátta hf. um stöðu Byggðastofnunar inniheldur ekki staðreyndavillur eins og stjórn Byggðastofnunar hefur haldið fram segir Sigurður H. Helgason, framkvæmdastjóri Stjórnhátta.

Pakistanar búa sig undir veturinn

Hundruð þúsunda Pakistana undirbúa sig nú fyrir kaldasta tíma vetrarins sem senn gengur í garð. Lítil sem engin hjálp hefur borist stórum hluta þessa fólks eftir jarðskjálftana í síðasta mánuði sem urðu um sjötíu þúsund manns að bana.

Telur sig hafa fundið flakið af Goðafossi

Tómas J. Knútsson sportkafari telur sig hafa fundið flakið af Goðafossi sem þýskur kafbátur grandaði á Faxaflóa í síðari heimsstyrjöldinni. Með skipinu fórust margir farþegar og skipverjar en nokkrir björguðust.

Stefna á framboð í sex sveitarfélögum

Frjálslyndir stefna á framboð í minnst sex sveitarfélögum næsta vor. Í síðustu sveitarstjórnarkosningum buðu þeir fram lista í þremur sveitarfélögum og komu manni í bæjar- eða borgarstjórn í tveimur þeirra.

Fundað vegna fréttar af heimabankaþjófnaði

Fulltrúar banka og sparisjóða sitja nú á fundi til að fara yfir öryggismál vegna fréttar Fréttablaðsins í morgun af þjófnaði úr heimabönkum. 25 ára karlmaður var úrskurðaður í gæsluvarðhald í gær vegna gruns um að hafa millifært milljónir króna úr heimabönkum fólks inn á eigin reikning og að sögn Fréttablaðins eru fjögur einstök þjófnaðarmál úr heimabönkum til rannsóknar hjá lögreglu.

Hvetur til árása á olíuvinnslustöðvar í múslímaríkjum

Ayman al-Zawahri, næstæðsti maður hryðjuverkasamtakanna al-Qaida, hvetur til árása á olíuvinnslutstöðvar í löndum múslíma í nýju ávarpi sem birt er á heimasíðu á Netinu.

Þremur bílum stolið í viku hverri

Þremur bílum er stolið í Reykjavík í viku hverri en lögreglan kemur aðeins höndum yfir einn af hverjum tíu sem stunda þessa iðju.

Sterkur ríkissjóður eða lök hagstjórn

Gert er ráð fyrir nítján milljarða króna afgangi á ríkissjóði í fjárlagafrumvarpi ríkisstjórnarinnar sem verður að lögum í dag. Stjórnarliða og stjórnarandstæðinga greinir þó á um hvort þau séu til marks um sterka stöðu ríkissjóðs eða að ekki sé tekið á óróa í efnahagslífinu.

Lögregla leitar enn manns sem beraði sig

Lögreglan í Reykjavík leitar enn að manni sem beraði sig framan nokkrar stúlkur við Grímsbæ við Bústaðaveg í fyrrakvöld. Stúlkurnar hlupu dauðskelkaðar heim og hringdu á lögreglu en maðurinn forðaði sér og hefur ekki fundist þrátt fyrir leit og eftirgrennslan.

Pyntingar eða háþróaðar yfirheyrslur?

Condoleezza Rice, utanríkisráðherra Bandaríkjanna, viðurkenndi að CIA flytti grunaða hermdarverkamenn án dóms og laga á milli landa til yfirheyrslna en þvertók fyrir að þeir væru pyntaðir. Yfirheyrsluaðferðir CIA eru hins vegar vafasamar svo ekki sé meira sagt.

Maraþonumræða um fjárhagsáætlun í gær

Maraþonumræðu um fjárhagsáætlun borgarinnar lauk ekki fyrr en undir miðnætti en hún hófst klukkan tvö í gær. Þar kynnti R-listinn meðal annars áform um að flýta næsta skrefi í átt að gjaldfrjálsum leikskóla.

Í gæsluvarðhald vegna innbrota í heimabanka

25 ára karlmaður var úrskurðaður í gærluvarðhald í gær vegna gruns um að hafa millifært milljónir króna úr heimabönkum fólks inn á eigin reikning. Að sögn Fréttablaðsins var maðurinn handtekinn í fyrrakvöld og snýst rannsóknin um að minnsta kosti fjóra þjófnaði með þessum hætti, allt upp í hálfa aðra milljón í einu tilvikanna.

Rice viðurkennir mistök

Condoleezza Rice hóf för sína til fjögurra Evrópulanda í Berlín í gær þar sem hún átti viðræður við Angelu Merkel kanzlara. Rice hét því á fundinum að Bandaríkjastjórn myndi bæta úr þeim mistökum sem henni yrði á í stríðinu gegn hryðjuverkum. Merkel sagðist eftir fundinn vænta þess að leikreglur lýðræðisins væru virtar í baráttunni gegn hryðjuverkahættunni.