Sigur­vegarar krýndir í Reykja­víkur­mara­þoninu

Fjórar vegalengdir voru í boði, heilt maraþon, hálft maraþon, 10 km og skemmtiskokk.

Hildur Björnsdóttir borgarstjóri ræsti í morgun klukkan 8:15 keppnisflokk í hálfu og heilu maraþoni. Keppnisflokkur í tíu kílómetra hlaupinu fór af stað klukkan hálf tíu og klukkan tíu var almenni flokkurinn ræstur í sömu vegalengd. Upphitun fyrir skemmtiskokkið hófst klukkan hálf tólf og var ræst út klukkan tólf. Tímataka stoppar kl 15:30. 

Beinni útsendingu frá keppninni er lokið en upptöku má nálgast hér fyrir neðan. 

Úrslit hlaupsins

Michael Bidmon frá Austurríki vann Reykjavíkurmaraþon karla en hann kom í mark á tímanum 02:21:36. 

Arnar Pétursson veitti honum harða samkeppni en dróst aðeins aftur úr á endasprettinum og varð annar, fyrstur Íslendinga, á tímanum 02:27:02. Silviu Stoica varð þriðji.

Marion Tibar frá Eistlandi vann Reykjavíkurmaraþon kvenna en hún kom í mark á tímanum 02:57:49. 

Liam Tilton frá Bandaríkjunum var fyrstur í hálfu maraþoni karla á tímanum 1:07:50.

Davíð Freyr Magnússon varð annar, en fyrstur Íslendinga í mark í hálfu maraþoni karla, þremur mínútum á eftir Liam, á tímanum 1:10:50.

Hörð barátta var um þriðja sætið en Atli Jasonarson kom í mark nokkrum skrefum á undan Bandaríkjamanninum Tommy Struzzieri.

Ólympíufari Íslands í skíðagöngu, Dagur Benediktsson, var svo rétt á eftir þeim í fimmta sætinu en hann var sigurvegari hlaupsins á síðasta ári.

Elín Edda Sigurðardóttir var fyrst í mark í hálfu maraþoni kvenna á tímanum 01:23:38 og Íslendingar áttu verðlaunapallinn því Hildur Aðalsteinsdóttir varð önnur, rúmri mínútu á eftir henni á tímanum 01:24:50. Rannveig Oddsdóttir verð þriðja á tímanum 01:25:31.

Baldvin Þór Magnússon var fyrstur í mark í tíu kílómetra hlaupi karla, eins og búist var við. Baldvin er einn sterkasti hlaupari landsins og eigandi Íslandsmetsins í greininni. Baldvin var nokkuð langt frá sínu besta (27:40) í erfiðum aðstæðum dagsins en kom í mark á fínum tíma, 32:13. Hann lýsti hlaupinu sem „góðri æfingu“ í viðtali eftir á. 

Íris Dóra Snorradóttir var fyrst í tíu kílómetra hlaupi kvenna á tímanum 37:29. Samkeppnin í því hlaupi var svakaleg. Katla Rut Robertsdóttir Kluvers kom í mark aðeins tveimur sekúndum á eftir Írisi Dóru og Sigþóra Brynja varð síðan þriðja, þrettán sekúndum á eftir Kötlu.

Íris og Sigþóra eru svo báðar á leið á HM í hálfu maraþoni í næsta mánuði. Baldvin fer einnig á HM og keppir þar í 5 kílómetra hlaupi.

Ný hlaupaleið 

Ný hlaupaleið var kynnt í júní og verður rásmark hlaupsins nú við Háskóla Íslands. Hlaupið hefst fyrir utan Háskóla Íslands, á Sæmundargötu. Allar vegalengdir hefjast á sama stað og enda svo á Geirsgötu.

Víða eru götur lokaðar vegna maraþonsins en nánari götulokanir má sjá hér. 

Sjá einnig: Víð­tækar götulokanir á nýrri hlaupa­leið Reykjavíkurmaraþons