Kanada­menn unnu stór­sigur en misstu mann af velli fót­brotinn

Kanadamenn stigu stórt skref í átt að 32-liða úrslitum heimsmeistaramótsins í fótbolta með 6-0 stórsigri á Katarbúum í kvöld.

Þetta var sögulegur sigur því hann er sá fyrsti hjá kanadíska landsliðinu í úrslitakeppni HM:

Gestgjafarnir höfðu mikla yfirburði í leiknum, skoruðu þrjú mörk í fyrri hálfleiknum og enduðu leikinn síðan ellefu á móti níu.

Cyle Larin kom Kanada í 1-0 á 16. mínútu en hann tryggði sínu liði jafntefli í fyrsta leiknum. Jonathan David bætti svo við tveimur mörkum fyrir hálfleik, það síðara eftir að hafa fylgt eftir skoti Larim.

Katarbúar áttu aldrei möguleika í kvöld og þeir fengu tvö rauð spjöld. Það fyrra fékk Homam Elamin á 33. mínútu fyrir brot á manni sem var að sleppa í gegn en það síðara fékk Assim Madibo fyrir að fótbrjóta Kanadamanninn Ismaël Koné á 53. mínútu.

Madibo fékk fyrst gula spjaldið en það var uppfært í rautt eftir aðkomu myndbandsdómara en þá var ljóst að Koné var mikið slasaður.

Madibo var niðurbrotinn en það gekk mikið á eftir brotið og munaði litlu að allt yrði vitlaust. Það tókst þó að koma leiknum aftur í gang.

Nathan Saliba kom inn á völlinn sem varamaður og skoraði fjórða markið með skoti beint úr aukaspyrnu á 64. mínútu.

Fimmta markið var sjálfsmark Mohamed Al Mannai á 75. mínútu eftir skot varamannsins Jacob Shaffelburg.

Jonathan David var ekki hættur og fullkomnaði þrennuna í uppbótartíma leiksins. Hann er því orðinn markahæstur á mótinu ásamt Lionel Messi.